janv.03
dans la catégorie Chti artésiens
Tout d'abord, inne bonne annay à tout chti qui passe par ichi.
Pingre, rapiat, pour in sou, t'es coupros l'queue d'in pou, t'es in dépiauteux d'puches, tin porte-monnaie i est in piau d'hurchon.
Hurchon : hérisson
Fil des commentaires de ce billet
Merci, Mincoin!
Eune bonne année à ti aussi, et surtout eune bonne sinté. In répète toudis l'même tous l'z'ans, mais incore plus chette année, vu que t'as eu aussi, comme mi, des misères de ch'côté là, l'année passée. 
D'un radin, j'ai d'jà intindu:
-Ya d'z'oursins à l'intrée d'ses poques!
Bonne année et bonne santé à ti aussi Mincoin ! In espérant que 2020 seuche miux que 2019 qui étot eune année d'brin !
Dins min coin des mines, un pingre, ch'est un pipiche !
Dictons du 3 jinvier :
- Sainte Geneviève ne sort point, si saint Marcel ne la rejoint.
- Montée d’sève à Sainte Geneviève n’est jamais que trêve brève.
- In janvier, l’médecin perd et l’forgeron gagne.
- Jinvier n'est pos bâtard : Si l'hiver ne vient tôt, i vient tard.
- Or du solel in jinvier est or qu’in n’dot invier.
- Si les mouques dinsent au guernier, ménage tin foin au guernier.
- Point ne s’implira l’guernier, si caud solel brille in jinvier.
.
. Saintes du 3 jinvier :
- Ste-Bertille, sainte de not’ coin, s’installa comme recluse dins eune cellule adossée à l’égliche ed’ Maroeuil (dins l’Pas-de-Calais), où ale passa l’essintiel de s’ vie…
- Sainte-Geneviève ne mangeot que l’diminche et l’jeudi. Et incore, ch’étot uniquemint du pain d'orge et quelques fèves mal cuites. De l'âge de quinze ans à celui de chinquante ans, ale ne mingea rin d'autre ! Après cet âge, ale étot tellemint faible et abattue qu'ale accepta d’minger, in puss, un tiot peu d’lait et du pichon.
Mal lui in prit : des envieux et des jaloux de sa sainteté firent courir le bruit qu'ale n'étot qu'eune hypocrite et que s’dévotion étot feinte ! Ch’étot bin la peine de faire ceinture pindint des années ! Mais tout cha n’l’impêcha pos d’vivre jusqu’à 89 ans !
In l'invoque pou l’guérison de l'érysipèle gangreneux (appelé mal des ardents ou feu sacré), contre les désastres, les pleufes excessives, la séqueresse, les fièfes, et les douleurs de l'infintemint.
Dins min coin des mines, un pingre, ch'est un pipiche !
In dit aussi "piche 3 gouttes dins 4 assiettes" !
Robocop i a d'jà fait des siennes ch't'année-chi in supprimint min messache ! 
Ein' bonne et heureusse année, Mincoin ! Et surtout, bonne santé !
In dirot qu't'as r'treuvé la forme, alorss garde-la ! In est cotint pou ti !
Ein' grosse baisse sarthoise.
Dictons du 4 jinvier :
- A l’saint Odilon, tout l’bos mort, mets au pilon.
- Le jour d’Saint Odilon souvint n'amène rin d’bon.
- Le temps d’saint Odilon, de celui d’l’année, souvint in dit long.
- Gelées d’saint Odilon présachent un hiver incore long.
- De Sainte Pharaïlde la caleur, ch'est l’colère et not’ malheur.
- Sainte Angèle brise el glache ; Si ale ne l’brise pos, ale l’imbrasse.
- Si l’quat’ jinvier est humide et vinteux, l'année s’ra mauvaisse ; S'il est frod et sec, l'année s’ra fertile.
- S'il gèle le quat’ jinvier, y aura six semaines de gel.
- Brouillard in jinvier, ch'est eune année mouillée. 
- Brouillard in jinvier, année insoleillée. Faudrot savoir ! (Un dicton, ch’est comme un homme politique : in peut li faire dire tout et son contraire !)
- Au puss qu’i gèle in jinvier, au puss que l'année sera féconde.
- Jinvier sec et sache est un bon présache.
- Soleil d'hiver, tard levé, bétôt couqué et caché.
- Jinvier d'iau chiche fait l’paysan riche.
.
Saints du 4 jinvier :
-Saint Odilon est invoqué contre la jaunisse.
-Sainte Angèle est l’patronne des personnes ridiculisées pour leur piété et est invoquée pour résoudre les problèmes reliés à l’bielle-famile et pour lutter contre la tintation sexuelle !
-Sainte Pharaïlde est invoquée maladies de langueur des enfants, pour les infants souffreteux, contre les maux d’vinte, les maux d’dints, les fièfes, les maladies du bétal, et pour la bonne conservation du burre. Comme miraque, ale ressuscita eune oie déjà désossée ! Vindiouss !
Espression chti pos très ragoûtante : "I est tellemint radin qu’i mingerot sin brin ! "
Ou bin:
-"Ya que l'brin, et l'finquée qu sortent de s'mason"
I'est tell'mint Rapiat qu'i' dit que l'tissu pou li armette eune pièche à sin fond d'maronne coûte trop quère et qu'cha ira comme cha!..et d'ajouter:"MI!j'ai présinté mes voeux l'an dernier pou' deux ans!!(économie d'salive oblige )Bonne année 2020 à tertous !
Espressions du Kimbrésis :
"I n'est pos larque" (large)
"I donne ein pos pou avoir ein' fêve"
"I fait attintion à ses buquettes".
I n'est nin de l'donne !
In n'sait pos si i faut rire ou si i fait braire !
http://nsm09.casimages.com/img/2020...
Pourquo qu'in dit que pour avoir d'l'argint d'vint soi, faut n'in mette d'coté?
Dins l'Nord, in a des espressions su les radins, ichi, in a des radins...
In tous cas li i' gagne des sous comme un coupeu' d'bourses et pindint qu'i' l'zé rételle ti té peux ruer l'cul et minger des r'tailles ed' ramon.
Dictons du 5 jinvier :
- A l’saint Gerlac, l’temps frod est serein, l'année s’ra bonne et fertile, ch'est certain.
- Le 5, té sauras quel mos t’auras.
- A l’saint Edouard, l’temps est raremint bon.
- Taille de saint Édouard fait les bonnes poires.
- Soleil couard à l’saint Edouard, hiver dérisoire.
- A l’saint Siméon, la neiche et les tisons.
- A partir de saint Siméon, té peux semer tes melons
- Si tu vos l'hierpe in jinvier, serre tin grain dins tin guernier.
- Manteau de neiche dins les prés, manteau de foin prochain été.
- Biaux jours de jinvier trompent l'homme in févérier.
- Brouillard in jinvier, année mouillée.
.
-Saint du 5 jinvier :
- Siméon (le Stylite) passa près d’ 40 ans au sommet d'eune colonne de 20 mètes de hauteur sur eune plate-forme de soixinte cintimètes où i pouvot même pos s’couquer. Avant, il avot passé quèques années au fond d'un puits sins iau, rimpli d’cafards et d’lézards ; puis dins un monastère où après quèques années, il in a été chassé pour s’être infligé de trop sévères mortifications ; puis i se retire pindint des années dins la solitute des montagnes et poursuit ses pratiques extrêmes, s’abstenant fréquemmint d’manger et s’astreignant à demeurer in station debout durant plusieurs semaines ; I déménage insuite dins un aute lieu et s’installe sur eune hauteur, inchaîné à un rocher ; puis, comme yavot trop d’monte qui venot l’vir, i s’est installé su’ s’colonne de 20 mètes de hauteur. Vu qu’il étot toudis exposé aux intempéries et au solel, il avot des plaies partout, notammint un ulcère à l’cuisse qui fut complétemint rimplie d’viers. Sin copain Théodoret montot ed’temps in temps in haut de l’colonne et voulot toudis l’panser et l’soigner. Il lui retirot les viers de l'ulcère. Mais Siméon li disot "Qu'avez-vous contre ces gintilles tiotes bêtes ?" et il obligeot Théodoret à armette les viers dins l’plaie !...Et i parlot même à chés viers ! I leur disot: "Mingez ce que Dieu vous a donné"… !
Quoique ch’étot pos biête, étint donné qu’les asticots mingent les chairs mortes et non les chairs vivintes, cha a nettiyé l’blessure !
Non seulemint, i vivot sur eune tiote plateforme mais in puss i passa des années sur eune seule gambe afin d’faire pénitence ! Incore un sacré saint maso !
J'sais pos si Siméon étot pingre, mais yavot quind même un sacré avantache ed’ vivre in haut d’eune colonne : In n’paye pos d’taxe d’habitation !
Si ach’t’heure, in décidot d’vivre sur eune colonne, cha s’rot moins intéressant puisque not’ Président a dit que 80% des frinçais ne paieront pus de taxe d’habitation in 2020 ! Ch’est magnifique ! J’sus pos sûr que l’chiffre seuche juste ou alors, ch’est mi qui n’a pos d’bol : j’fais partie des 20% qui vont continuer à raquer ! J’vas aller m’installer sur eune colonne, cha s’ra plus économique !
M'grind mère, quind in parlot de l'caisse d'éparne ale tatot l'bourse loÏée à s'vinte sous l'écourcheu et l'caressot in disant:L'éparne ch'est mi!j'ai pos confiance à tout cha !!!pis là d'sue ale mouquot sin nez et s'infilot un g'nièfe !
Aujord'hui ch'est l'éphiphanie (Et pis Fanny...dins l'Midi !)
Ch'est l'jour où in minge la galette ! Quind j'habitos dins l'midi, l'galette des rois n'etot pos faite aveuc de l'pâte feuilletée. Ch'étot de l'pâte briochée in forme de couronne. Cha n'avot rin à vir aveuc c'qu'in connot dins ch'nord ! Ch'étot assez bourratif...
Et pour rester dins l'thématique chère à quéqu'un, la galette, ch'est aussi de l'argint ! Des sousous ! De l'oseille ! Du pognon !...Ch'est pour cha que les pingres adorent la galette (de l'Epiphanie) !
....et i' cantent :AAAhh! du blé !!!du blé !!!....
... et nous in est" blettes !!"
Tout cha, cha m'hérisse !
Cha et les écrêpe-salière !
Ecrêper: gratter,râcler comme un Harpagon !
"Aujord'hui ch'est l'éphiphanie"
Ben nan, ch'est d'main !
Mi, j'veux pos d'querelles de clocher pour cha. Pour ceuss qui respectent strictemint les dogmes de l'église catholique et la Bible, ch'est le 6, mais ach't'heure, in France où ch'est pos un jour férié, ch'est plutôt fêté l'premier diminche de jinvier :
"D’après l’église catholique, cette fête de l’Épiphanie est venue d’Orient où elle a été fixée au 6 janvier : fête des lumières, fête de l’eau, elle est beaucoup plus la célébration de l’inauguration du ministère public du Christ, lors de son baptême au Jourdain, qu’une festivité des événements de l’enfance de Jésus.
Dans la liturgie latine, là où ce jour n’est pas férié, sa célébration est fixée au dimanche le plus proche du 6 janvier, afin que le plus grand nombre des fidèles puissent la commémorer. Cette année, cela tombe ce 5 janvier."''
Et les années suivintes, cha va quinger aussi :
http://icalendrier.fr/religion/fete...
J'in profite pou' souhaiter un joyeux nowel orthodoxe en ce 6 jinvier à tous les chtis concernés et ch'est pos Galibot qui nous dira l' contraire !sauf si sin calindrier bin sûr est tout autre !in n'sait pus !!!!
In tous cas l'épiphanie chez les pingres cha dot pos être gai !alors qué l'sins du mot je cite est :L' révélation soudaine accompagnée ou baignée d' leumière !Dins la BD in artroufe sous forme imagée ce sens par un bonhomme aveuc au d'sus dé s'tiête eine lampe halogène ed' 100 watts!
"Aujord'hui ch'est l'éphiphanie"
Pour eune fos que Galibot yé d'accord aveuc l'calindrier d'la poste! 
Sans blaguer; chez les beiches pindint tros ans l'épi-fanny s'ra à l'minme date !!!eul' 6 !!Ch'est pos eine histoire belche !
Ej'viens d'aller consulter el' calinderier de l'poste !! ch'est l' chonq !!I'sont un avinche sur eul' pape qui l' fête aujord'oui!!
...ou bin alors el' pape i'a un jour d'artard su' l'calindérier de l'poste !In est quind minme au sièque ed' l'information ultra rapite!!!pourquo ces lacunes???..alors que ch'est là qu'eune information dot s'avérer exacte !!!
Dictons du 6 jinvier :
- Min bon saint Mélaine, arrose-nous comme ej’ t'arrose. (Saint Mélaine est connu pour amener la pleufe ! Rin d’étonnant à cha : ch’est un saint breton !...)
- Malin, comme saint Mélaine prinds soin de sin bas d’laine.
- Pleufe du six janvier dure à satiété.
- S'il pleut le 6 janvier, la récolte de vin s’ra bonne.
"Pour eune fos que Galibot yé d'accord aveuc l'calindrier d'la poste!"
Pour eune fos que l'calindrier d'la Poste, i ne s'trompe pos !
Tiens, hier soir à l'télé, i z'ont repassé "Les tontons flingueurs " Avec la célèbre réplique de pingre de Francis Blanche :"Touche pas au grisbi, salope !"
Yavot eune bielle brochette de pingres et de truands dins l'film !
V'là eune tiote imache où ya tous les acteurs du film ! J'ai rajouté un truand de plus ! A vous de deviner lequel ! Ch'est pos facile ! http://nsm09.casimages.com/img/2020...
"J'ai rajouté un truand de plus !"
T'as pas honte ed dire qu'ch'est ein truand ! Ein bon citoyen dot respecter sin présidint ! 
"T'as pas honte...?"
Ben non ! Quind i m'aura rindu les 1 150€ qu'i m'a piqué in augmintant l'CSG sur les artraités edpuis jinvier 2018, alors, pétête que j'dirai qu'ch'est pus un truand ! Condition sine qua non !
Par ailleurs, j'respecte beaucop l'camimbert Président !
Cafougnette et s’femme vont chez l’dintiste. Dins l’salle d’attente, Cafougnette dit à s’femme :
- Acoute, j’vas passer avint ti : mi, j’in ai pos pour très longtemps.
Quind sin tour arrive, Cafougnette s’installe dins l’fauteul et deminde au dintiste :
– Combin qu’cha coûte d’artirer eune molaire aveuc anesthésie complète ?
– I faut compter 100 euros.
– Ah ! Trop ker ! Et juste aveuc eune anesthésie locale ?
– Dins ce cas, 50 euros.
– Ah ! Trop ker ! Et sins anesthésie du tout ?
– Cha fera 30 euros…
– Ok, in va faire comme cha alors.
Cafougnette s’lève, artourne dins l’salle d’attente et dit à s’femme :
– Té peux venir chérie ! Ach’t’heure, ch’est tin tour.
Derniers commentaires