déc.12
dans la catégorie Chti artésiens
Il est plutôt du genre fatigué de naissance, les chtis disent de lui :
Y'é toudis mate, i n'peut pus arquer et incore moins ouvrer, i frot bin keuète. Le vla arcuit (brûlé), écrampi (engourdi), mate d'aller, pataflaque (sans énergie), raplapla, réhu ; pourtant j'ai entendu dire : qu'après mate, y a cor in villache !
Fil des commentaires de ce billet
...certains l'seurnomment:"l'général Dordebout "
Quéquin qui est molasson, in dit:
-Li, yé né mate.
-Yé mate in s'levant.
Ah ! Ch'Père Noël i'est passé in avinche ! Merci Papa Mincoin-Noël pou ch'nouviau billet ! 
Ch'est vrai qu'in étot mates à arcacher quetcosse ed neu à dire sur l'ancien billet ! 
Nouviau billet, nouviaux dictons ! 
Dictons du 12 déchimpe :
- A sainte Constance, plein hiver in France
- A l’saint Corentin, l’plein hiver glace le quémin.
- A l’saint Corentin, l’hiver est in quémin.
- A l’saint Corentin, gelée du matin, solel cabotin.
-A sainte Constance, plein hiver in France.
-Le mos d’l'Avent est sujet au vent.
-Tel Avent, tel printemps.
-Neiche de déchimpe est ingrais pou l’tierre.
-Déchimpe aux pieds blancs s'in vient ; An de neiche est an de bien.
-Si déchimpe de frod est chiche, l’paysan ne s’ra pos riche.
-Solel d'hiver, tard levé, bétôt couqué et muché.
.
-Saints du 12 déchimpe :
-Sainte-Jeanne-Françoise de Chantal est l’patronne des gins abandonnés, des veuves et des parints séparés d’leurs infants. Alle est invoquée pour résoudre les problèmes reliés à l’bielle-famile et pour soulager la peine lors du décès d’un parint.
-Saint-Finnian est invoqué pour ête débarrassé de l’vermine.
-Saint-Corentin guérit les ingelures et la paralysie.
-Corentin vivot dins un bos et n’se préoccupot pos trop de s’nourriture car il disot que Dieu y pourvoirot. Corentin savot faire jaillir des fontaines. Yavot un pichon dins l’fontaine qu’il avot fait jaillir à côté de s’baraque. Chaque matin, i s’levot et allot s’coper eune tranche de sin pichon pour se sustinter. Puis il remettot les arêtes dins l’fontaine et le lindemain, il artrouvot sin pichon vivant, reconstitué et tout frétillant ! Il arot pu crier : « Il est biau, min pichon frais ! Il est biau ! Il est bio et il est frais ! » I faut dire quind même qu'il avot pris soin de n’pos abîmer l’ tiête !!!
Un jour, Gradlon, roi de Cornouailles vint l’visiter. Le pichon alors se démultiplia tout seu et il put nourrir abondammint le roi et toute sa suite ! Ch’est l’pichonnier du coin qui faisot la tronche ! In l’comprind !
Bin, mi ch'matin; j'sus allé faire les courses pour Noël ! J'in peux pus ! J'sus arqueu ! J'sus esquinté !
Bin, mi, ch'matin, j'ai dégivré min congélo ! J'étot tell'mint mate que j'me suis affalée dins min canapé pou m'arposer et j'm'ai indormie !
Et mi alors!!! .. ed'pus l'temps qué j'travalle pus ch'est pindint l'dormache qué j'm'arpose el' mieux!
Zeph au bistrot ch'est un grind jueux d'belote et d'manille découverte mais y'a pos qu'cha !!!i'connot aussi les echecs! Sélectionné i' rinconte un certain KASPAROV et prétind in découdre.Au bout d'plusieurs tours d'horloche Zeph sint ses paupières s'alourdir, ses membres s'raidir et dins un dernier sursaut l'torpeur l'invahissant il ânonne dins un soupir à Kasparov:"ECHEC et MAT !
Mi, j'ai armarqué qu'au plus que j'dors, au plus que j'sus mate!
In été, avec 7 heures d'sommel, cha m'suffit pour ête arposé, alors qu'in ch'momint, i m'faut 8/9 heures pour mi récupérer! Cha dot ête l'hiver qui veut cha.....ou bin l'âge 
...minme réaction.J'appelle cha"l'dormance hivernale"ch'est comme les plantes;in hiver l' sève ale déquind : l'arpe i' dort!
A l'sainte LUCE saut d'une puce!
J'connos un canteu : Mat'POKORA ;i'est toudis in pleine forme!in vot bin qu'i' sont jonnes !
Ch'Galibot i dot ête rudemint mate aujord'hui: Ya pos incore rin posté!
Un impondérape probablémint..chu qué j' crains ch'est la riposte !
Quind j'étos jonne j'pétos des flammes;j'étos increvape sauf à vélo!!m'man-man ale disot souvint à l'voisine Sidonie qui avot un garchon langreux:Min Léon i' n'arrife pos à s'amatir cha m'inquiète !
S'amatir=se fatiguer davantage pou' bin dormir au soir !
Ch'est mi que v'là !
J'ai pos été là hier, vu que j'me suis fait opérer d'l'oeul ! J'avos un entropion ! Ch'est l'paupière inférieure qui s'artourne et les cils rintrent dins l'oeul et à forche ed cligner des zius l'oeul est tout inflammé !
Ch'est fait ! J'devos ête opéré à 7h 30 et j'ai été opéré à 12h 30 ! J'ai passé 5 heures allongé sur un brancard dins un couloir ! Que brin !
Quind j'sus arvenu à m'majon dins l'après-midi, j'étos tellemint mate que j'me suis indormi jusqu'à 23h ! Sacrée sieste !
Ch'matin, j'ai pu inlever min bandache ! Horreur ! J'ai un oeul comme celui d'Rocky au 15ème round ! Affreux ! Un sacré cocard tout gonflé ! Quind j'su sorti de m'baraque, mes visins m'ont vu : J'ai dit qu'ch'étot m'femme qui m'battot ! Et l'visine qui est enceinte, en m'veyant, a failli faire eune fausse couche !
Avec tout cha, j'ai pris du retard sur les dictons ! J'vous mets ceux d'hier car j'les avos préparés d'avinche dans Word ! Ceuss d'aujord'hui, j'verrai cha dins l'jornée, si j'ai min oeul pos trop fatigué !
.
Dictons du 13 déchimpe :
- Pou’ l’sainte Luce, les jours augmintent du saut d'eune puce.
Ach’t’heure, ch’dicton n’est pus valape ! J’l’avos espliqué ya quèques jours : in est passé du calendrier Julien au calendrier Grégorien, en 1582 ! La sainte Luce étot au 23 déchimpe, juste après l’solstice, jour où les jours augmintent ! Mais l’dicton est resté pou' l' nouviau calindrier Grégorien et Sainte Luce a été reléguée au 13 déchimpe, date où les jours n’augmintent pos incore !
- Solel de sainte Lucie est souvint indécis.
.
Saints du 13 déchimpe :
- Saint-Josse est l’patron des marins et des navigateurs. Il est invoqué contre la fièf’, les incendies et les naufraches. In lui adresse aussi des prières pour la protection des moissons.
- Sainte-Odile est invoquée pou l’guérison des maladies des zius.
- Sainte-Lucie est l’patronne des personnes non-voyantes, des couteliers, des agriculteurs, des vindeurs, des fabricants d’vitraux et des écrivains. Ale est invoquée pour faire cesser les hémorragies, pour artrouver la vue, pour guérir les maladies des zius (donc des entropions !) et pour soulager les maux de gorche.
Et pourquo Sainte Lucie est invoquée pour les maladies des zius (donc des entropions ! ) et par les non-voyants ? Et pourquo ale est souvint arprésentée aveuc un plateau sur lequel sont posés ses deux zius ? Hé bin, ch’Galibot i va vous donner l’tuyau !
L’paufe Lucie étot harcelée in permanince par un prétendant. L’paufe femme qui n’in pouvot pus, li deminda :
- Mais quo qui vous plaît donc tellemint in mi ?
L’prétendant, qui n’étot pos né de l’dernière pleufe, s’est dit in li-même : « Si j’lui dis qu’ch’est pour s’in cul, ale va m’foute à l’porte !"
Donc, hypocritemint, i lui dit :
- C’qu’i m’plait in vous, par ed’sus tout, ch’est vos biaux zius !
Alors Lucie rentra dins s’champe, prit sin coutiau et s'arracha les zius qu'ale mit sur eune assiette.
Puis, à tâtons, ale porta l'assiette à sin prétendant in li disant :
- Puisque t’as querre tint que cha mes zius, prinds-les ! Mais j’te préviens : t’aras rin d’aute !
Sacrée Lucie ! In n’connot pos l’réaction du prétendant !
Galibot, t'as bintôt fini d'nous raconter des horreurs ! S'arracher les zius aveuc ein coutiau ! Je n'd'ai des frissons ! Quind j'pinse à l'douleur qu'in a quind in s'cope ein tiot peu sin dogt in f'sant à minger...
Ch'est marrant,cha: Ste Lucie est invoquée pou les personnes non voyantes, et aujord'hui, ch'est Ste Odile, et ale est aussi l'patronne des aveules!
A eune journée près, ales vont s'faire concurrince!
El' mont sainte Odile i'se situe in ALSACE dusse qué ch'est qu'i a eu un crache aveuc un avion qui a pos su s'erdresser !l'histoire d'Odile ch'est eine bin triste histoire aussi!!pos bin lon i'a eune fontaine dusse qué les gins i' vont pou' frotter leurs yux !
...ch'est fort escarpé et quind t'arrifes in heut du mont t'es tell'mint mate qué té n'sais pus dire "flip"!mais arrivé là, t'as des lorgnettes et in y mettant tin oeul té découvres toute l'Alsace !ch'est bia !
"Galibot, t'as bintôt fini d'nous raconter des horreurs ! S'arracher les zius aveuc ein coutiau !"
Ch'est l'Histoire ! Ou la léginde, comme té veux !
Mais aujord'hui, pour compenser l'horreur, j'raconte l'histoire d'eune aveuque qui a artrouvé la vue ! Voilà ! Comme cha, ch'est équilibré et té vas artrouver l'sourire ! 
!
.
"Ch'est marrant,cha: Ste Lucie est invoquée pou les personnes non voyantes, et aujord'hui, ch'est Ste Odile, et ale est aussi l'patronne des aveules!A eune journée près, ales vont s'faire concurrince!"''
Té cros pos si bien dire ! Sainte Odile a été pindint très longtemps fêtée l'13 déchimpe !!! Jusqu'à un jour où un éminent ponte de l'Eglise s'est rindu compte que cha faisot doublon (Hé ouais, ya pos qu'Noléon qui doublonne !) et l'fiête de Sainte Odile a été déplachée au lindemain !
Dictons du 14 déchimpe :
- S'il neiche à l’sainte Florian, les récoltes seront in excédent.
- A l’saint Nicaise, les gelées naissent.
- A l’saint Nicaise, l’arnard est souvint blaise.
- Quand à sainte Odile tompe la neiche, l’gel est souvint du cortèche.
- Solel de sainte Odile n'est pos promesse d'avril.
- Sainte Odile in sin monastère ouvre les zius d’ses pairs
- Année de gelée, année de blé.
- Quind in hiver est été, mais in été hivernée ; Cette contrariété ne fit jamais bonne année.
- Tonnerre d'hiver, tonnerre d'nfer.
- Chaque chose in sin temps, les navets et les choux pou l’mos d’l'Avent.
- Quind aux Quatre-Temps d'hiver, l’vint qui souffèle samedi à minuit est du sud, ch'est signe d'un hiver doux et pluvieux ; Si l’vent souffèle du nord, ch'est signe de neiche et d’frod.
.
Sainte du 14 déchimpe :
Odile, quind ale est née avot deux gros défauts pour sin père Adalric : ch’étot eune fille et li, i voulot un garchon ! Premier défaut ! ! Ale étot aussi aveuque ! Deuxième défaut ! Donc, Adalric dit : "A quo qu’cha sert ed’garder eune infant comme cha ! Faut la tuer ! Faut la décapiter ! " Ch’est qu’in n’rigolot pos à l'époque !
Mais s’mère n’a pos voulu qu’in tue s’tiote fille et l’invoya ln douce dins un monastère à Baume-les-Dames in Franche-Comté (Ch’est très joli là-bas ! Si vous y allez, faut vir aussi Baume-les-Messieurs, ch’est cor’ plus biau ! j’ferme eul parinthèse ! J’précise que j’ne sus pos payé par l’Office du Tourisme !).
Et Odile, in archevant l’baptême, arcouvra tout-à-cop la vue !!! Ch’est-y pos formidape, hein Kimberlotte ! ?
Et ch’est pour cha qu’ach’t’heure, ch’est la Sainte Patronne des aveuques et des ophtalmologistes ! Ale est invoquée aussi pour la délivrince des âmes du Purgatoire.
Un jour,20 ans plus tard, Hugo, l’frère d’Odile, voulut dire à sin père que sa sœur Odile étot toudis vivante. I pinsot qu’cha allot faire plaisir à sin père ! Erreur ! Le père devint fou furieux ! « Commint cha ? In m’a désobéi ! In m’a humilié ! » et i trinsperça sin fils aveuc s’n’épée ! Et l’paufe diape rindit l’âme ! Queulle époque ! Désolé, Kimberlotte !
Pou' arvénir au sujet qui nous préoccupe: toudis Mate .; l'an dernier au nouvel an in a été vire un orchestre inglé : l'orquess'
jame'e' matt!;in a dinsé dé l'breunette au crépuscule sans fonflir .Qui ch'est qui disot qu'après mate i'avot 'cor un villache!!!
J'sais pos si ya un villache après mate, Noléon, mais mi j'ai treuvé un villache qui s'appelle Mat Leon Village ! Véridique ! In malaisie ! J'ai pos réussi à mett' le lien mais cha existe ! Té peux vérifier !
...ben ouai!véridique!y'avot minme un Léon BURGER qui ténot eune baraque à frites! Jamais mate s'baraque ale tournot sept jours sur sept!ch'est comme cha qu'in fait fortune qu'i' disot toudis !i' cultivot aussi des tomates et s'lévot tôt l'matin pou' l's arroser.Un sacré gaillard !i'faisot cha machinalement par simple habitute! un vrai automate !
Si à Sainte NINON Déchimpe i'est trop biau(i'fait pos frod)in ara l'été dins l'iau !!
NINON!ch'est d'l'espagnol cha veut dire:tiote gadrouillette !!
Dictons du 15 déchimpe :
- S'il neiche à l’sainte Ninon, i neiche à gros flocons.
- Solel de sainte Nina, pour un long hiver rintre tin bois.
- Quind i tonne hors-saison, pleufe ou neiche sins raison.
- Frod et neiche in déchimpe, du blé à revindre.
- Pleufe orageuse dins l'Avent, l'hiver n'arrife pos à temps.
- Plus les Avents sont vinteux, plus les vergers sont plintureux.
- Dins l'Avent, l’temps caud rimplit caves et tonniaux.
.
Saint du 15 déchimpe :
Aujord'hui, ch’est aussi l’fiête de Saint Jean le déchaussé (fin du 13ème sièque) dins l’diocèse de Léon (pas Léon d’Saulzoir !) mais Léon in Bretagne.
Ch’étot un curé qui parcourot sin diocèse à pieds décaux. D’où sin surnom de "déchaussé".
I faisot carême tout l’temps, sins minger de chair ni boire de vin ! Sauf quind i tombot malate !
I s’nourrissot uniquemint d’pain d'orge ou d’fèves qu'il laissot moisir exprès afin qu’ils seuchent détestapes au goût !!! Beurk ! Comme pour s’punir ed’ minger !
Pour la boisson ch’étot parel : i rajoutot toudis du vinaique dins l'iau qu'il buvot ! Pour s’punir ed’ boire !
In plus, l’Histoire raconte qu’il n’arrétot pos d’braire ! Comme eune fontaine ! Comme s’il avot perdu s’quinzaine ! I brayot toudis et tellemint qu'il trempot sin pain sec dins ses larmes avint de l’minger ! Ch’étot sûremint s’recette personnelle du pain perdu !
Côté vêtemints, yétot aussi arnéqué comme l’as ed' pique : I s’habillot pire qu’un épeutnard ! I faisot fuir les zoziaux ! I s’habillot d’robes grossières qu’il raccomodot li-même et qui étotent faites de crins de g’va pou qu’cha gratte bien l’piau ! Ou d’piaux de porc dont les poils étotent copés in deux pou’ qu’cha pique bien l’piau aussi ! Ou incore d’grosses étoupes de chanvre pou’ qu’cha seuche bin inconfortape !
Et i ne s’plaignot jamais d’ses pieds complètemint abimés par ses lonques marches à pieds décaux et i pouvot parcourir des dizaines ed kilomètes sins ête jamais mate…
In avot d’jà parlé ichi des saints masos ! Mais chti-làl, ch’étot l’pompon ! Yétot cor’ plus maso qu’les zautes !!!
Il est l’patron des pauvres. In l'invoque pour artreuver les objets perdus.
I z'étottent gramin masos chés saints du timps passé, mais à m'mote que li, i tiens l'pompon!
Mi, cha m'a d'jà arrivé d'boire du vin trop viux, qui étot tourné in vinèque, mais pos d'là à n'in rajouter dins min verre! 
Tout cha pour dire qu'i faut pos laisser viuzir trop lontimps du vin à cafe, faut l'boire avint qui suriche!
Dins chés coins là in arot tindince à dire qué cha sint l' musi !
Ban Diminche et r'pos dominical !i' fait bia aujord'hui!i'a messe à BERCK !
CH'est marrant min prénom in l'artroufe partout!Jé m'déminde si dins chés jonnes mineurs i'avot des" Léon"!!fort possipe!ch'est un prénom à succès!dins l'intiquité i'avot aussi Léonidas! hélas i' s'est r'trouvé chocolat face aux PERSE!
I' est mourru aux thermo-piles in martyr sans être saint et pindint logtimps in l'a fêté et honoré dins les "léonidées !IncroÏape!!
M'mère ale avot ein cousin qui s'appelot Léon. Cousin Léon i habitot dins chés baraques in bos qu'in avot construit apreu l'guerre 14-18 à Kimbré. In appelot cha "Le nouveau Monde", alors ch'étot Léon du Nouveau Monde. In l'z'a rimplachées par des masons in brique fin des années 50. Ach'teure, ch'est l'Cité Amérique.
M'mère ale avot querre canter dins les dîners d'famile. Et ein' ed ses canchons préférées, ch'étot "Léon", d'Annie Cordy.
https://www.youtube.com/watch?v=lgs...
L'grind succès qu'j'ai eu auprès des filles(deux nicole deux Monique eine Chantal et eune inconnue) jé l'dois in grinde partie à Annie Cordy!Sur min passache ales répétotent l'canchon que j'trouvos un peu "olé"I'avot un indrot dins l'refrain qui n'mé plaisot pos d'trop ch'est quind ales z'insistotent sur cette phrase: "t'as les guibolles in accordéon " quind j'sortos du bar après la messe!Min copain d'bistrop qui s'app'lot GUY pour blaguer m'disot:"t'as pas d'bol !!
Ales disotent n'importe quo ! Dins l'canchon, ch'est pos Léon qui a les guibolles in accordéon, ch'est Annie Cordy !
"L'grind succès qu'j'ai eu auprès des filles..."
Té devros quinger de pseudo ! "Léon-l'tombeur-de-ces-dames" cha s'rot miux !
Dictons du 16 déchimpe :
- Quind i pleut à l’sainte Alice, ch'est souvint comme vaque qui pisse.
- A l’sainte Alice, de l’neiche et du gel déjoue la malice.
- A l’sainte Alice, plantes in pot sous l’pelisse.
- Les frods d’saint Evroult sont des frods d’loup.
- Hiver rude et tardif rind l'hiver productif.
- Qui plinte pindint l'Avent gagne eune année de temps.
-Sainte-Adélaïde (ou Alice) est l’patronne des familles nombreusses et des biaux-parents. Ale est invoquée pour résoudre les problèmes liés à la bielle-famile (Et qui cause el pluss ed’ problèmes dins les bielles-familes ? Les bielles-mères, pardi !?)
Bin ouais, faut dire aussi qu'Léon, cha rime aveuc: Apollon! 
Incore un dieu vivant!!Apollon!qui tind vers l'idéal et la beauté!
Jé m'sins attiré vers le haut!! cha y est j'sus in lévitation!!Tapis vole ! Ban ch'est pos l'tout j'm'in vais à l'hospital ;m'finme a eune pneumopathie comme mi l'an dernier!j'espère qu'cha va s'arringer pou' les fêtes!.....
J'espère pou ti aussi, Noléon, et surtout pou t'finme ! Aveuc ein' pneumopathie, et à forche ed tousser, ale dôt ête mate ...
Des pneumopathies, j'in ai fait plein ! Au moins deux fos par an, tous les ans ! Ch'est pénipe à vivre ! Edpuis qu'j'ai arrêter d'finquer ya 3 ans, je n'in ai pus fait eune seule ! J'touche du bos !
Mi parel, ch'étot des bronchites, et d'puis que j'ai arrêté d'finquer, (6 ans), pus d'bronchites.Ch'toubib i appelot cha: BPCO (bronchopneumopathie chronique obstructive).
L'toubac, ch'est vraimint de l'saloperie ! Ya quèques années, j'avos pus que 35% d'capacité pulmonaire ! J'ai dû ête branché sur oxygène la nuit...Pfff!
Ach't'heure, j'ai récupéré 70% d'capacité pulmonaire ! Ch'est d'jà bien, mais j'sus à min maximum a dit min pneumologue ! Cha n'pourra pus progresser ! Et ch'est même exceptionnel que j'ai pu récupérer autant, selon lui !
Dictons du 17 déchimpe :
- A l’saint Gaël, jour de gel, jour de fiel.
- A l’saint Gaël, l’frod arvient d’plus belle.
- Souvint à l’Saint Lazare, l’frod gagne ou file vers l’montagne.
- Souvint quind saint Lazare appelle el frod, i n’reste pos.
- Aveuc les grèves, à Saint-Lazare, vaut miux pos aller à la gare !
.
-Saints du 17 déchimpe :
-Saint Judicaël est arprésinté aveuc eune couronne à ses pis et un balai à l’main. Yavot kerre faire el ménache, sûremint.
Ch’étot aussi un saint maso qui avot kerre souffrir. Un jour ya rin treuvé d’miux à faire que d’creuser un tro dins l’glace du lac, in plein hiver ! Et de s’baigner ed’dins ! Heureuz’mint que quéqu’un l’a vu et a réussi à l’arsortir in extremis ! Yétot tout bleu !!!
Il a eu un fieu, Josse, qui a donné sin nom à l’commune de Saint-Josse dins l’Pas-de-Calais.
Sin aute fieu Winoc partit in pays Flamind et est cor’ honoré à Bergues (qui,d’ailleurs, jusqu'à l’ révolution s'appelot "Bergues-Saint-Winoc")
.
-Sainte Begge étot l’ fille de Pépin (de Landen) qui donna naissance à l’ dynastie des carolingiens.
L'histoire dit que sin tiot-fils Charles Martel avot tué un ours gigantesque à cops d’martiau ! Z’allez m’dire : « Fastoche ! » . Mais i faut préciser que Charles Martel avot 9 ans à l’époque ! In comprind miux ach’t’heure, que pour li, battre les Arabes à Poitiers in 732, ch’étot eune promenade de santé !
Dictons du 18 déchimpe :
- A l’saint Gatien, les jours rallonchent du pas d'un kien.
- A l’saint Gatien, l’temps n’vaut rien.
- A l’saint Gatien, vilain (paysan), ramasse tin bois et indors-toi.
- Si déchimpe fait l’tendre, cros-me, l'hiver n'est pos loin, il est là à l’saint Gatien
- La neiche de l'Avent gèle facilement.
- La neiche de l'Avent a d’lonques dents.
- La neiche de l'Avent n’a jamais gardé sin vent.
- La neiche de l'Avent n’dure jamais longtemps.
.
Saints du 18 déchimpe :
- Comme saint Antoine de Padoue, Saint Gatien est invoqué pour artreuver les objets domestiques perdus.
- Ch’est pos pour Kimberlotte, ch’t’histoire là ! Kimberlotte, té lis pos ! Saint Judas Machabée (le marteleur) fut sins doute le premier à inventer la persécution religieuse. Les femmes qui faisotent circoncire leur infant étotent massacrées aveuc leur bébé pindu au cou !
- In a aussi l’fiête à Saint Malachie d’où vient l’dicton galibotesque : « Bien Malachie ne profite jamais ! »
-Aujord’hui, ch’est aussi la "Fête de Notre Dame de l'O". Quo qu’cha veut dire ?
Pindint les 7 jours précédint Noël, (du 17 au 23 déchimpe) in cante, chaque jour, pindint l'office des Vêpres, le refrain d’un psaume qui comminche par la lettre « O ».
Et ya un refrain qui comminche par : "O Emmanuel, toi qui est notre roi...!"
Ch’refrain là est beaucop canté à l’Elysée, parait-il…
Dictons du 19 déchimpe :
- S'il pleut à l’Saint Urbain, ch'est quarante jours ed’ pleufe in quémin (I fait concurrince à Saint Médard ?)
- A l’saint Urbain, l’hiver n’est jamais lambin.
- Quind Saint Urbain prind sin bain, doucheur dins l’gardin.
- L’vigneron n'est rassuré que l’saint Urbain passée ; Plus il y aura d’neiche, moins y aura d’grêle.
- Y aura ni bon vin ni pain blanc s’il gèle à l’saint Urbain.
- Si l’solel luit à l’saint Urbain y ara du vin.
- Urbinet, ch’est l’pire ed’ tous ! Quind i s’y met, i casse l’robinet.
- Au mos d'avril, l’blé est in épis ; A l'saint Urbain, yé in grains.
- A l’saint Urbain, c’qui reste de l’vigne cha n’vaut rien.
- Déchimpe aux pieds blancs s'in vient, an de neiche est an de bien.
- Oignon bien habillé verra fortes gelées.
- Tonnerre de déchimpe promet beaucop d’vint pour l'année suivante.
- Neiche avant Noël, fumier pou l’seigle.
- A l’Saint Boniface, que veux-tu que la bonne y fasse ?
Puisqu’in parle d’Urbain, cha m’rappelle eune tiote blague :
Un couple de viux cinsiers, Nadette et Gaston, a pris rindez-vous aveuc Stéphane Plaza, car i z’ont invie d’quitter l’campagne, de vindre leur ferme et d’aller vivre dins un appartemint in ville :
Stéphane Plaza deminde à l’fermière :
- Alors, comme cha, ach’t’heure, vous préférez l’habitat urbain ?
- La bite à Urbain ? Nan ! Cha m’intéresse pos ! J’préfère garder la bite à Gaston !
,ale est bonne, Sheila chelle là!
Dictons du 20 déchimpe :
- Pleufe de saint Théophile n’est que larme de crocodile.
- A l’saint Jacob, dins nos pays, les pies comminchent leurs nids.
- Au 20 de Noël, les jours rallonchent d'un pas d'hirondelle.
- A l’Saint Zéphyrin, temps d’brin !
- In déchimpe, quind l’jour croît, aussi fait l’froid.
- Autant de jours d'hiver passés, autant d'ennemis rinversés.
- Saint-Dominique (de Silos) est l’patron des bergers, des prisonniers et des femmes enceintes. Il est invoqué pour faire fuir les insectes, pour ne pos ête mordu par un kien inragé et pour guérir de la rage et de l’hydrophobie.
A m’n ‘avis, « mate » cha dot venir de l’allemand matt (= fatigué) J’me souviens d’min prof d’allemand au collège, qui disot quind i veyot un élèfe qui s’indormot pindint les cours :
« Du bist matt ? Gehe zur tafeul ! Schnell ! Dummkopf ! »(T’es fatigué ? Va au tableau ! Vite ! Crétin ! »
Yétot pos commode min prof d’allemand. Ch’étot un viux garchon.Il arrivot très souvint complètemint bourré l’matin! I n’arrivot pus à écrire su l’tableau ou i comminchot eune phrasse in haut de ch’tableau et il la finissot in bas de ch’tableau…
In puss, il avot toudis au bec eune clope : ch’étot des Gitanes maïs qu’il n’arrêtot pos d’ralleumer pindint l’cours.(A l’époque les profs avotent el drot d’finquer in classe).Un jour qu’il s’étot absinté chinq mineutes de l’salle, ya un élèfe qui a pris sin briquet su l’bureau et qui a mis la molette à fond. Quind l’prof a voulu ralleumer s’clope, i s’est cramé l’moustache et les caveux !
Ch’étot eune jornée d’anthologie ! J’m’in souviendrai toute eum vie !
In puss, il avot eune maronne qui tenot aveuc des bertelles. Mais chés bertelles étotent trop tindues, si bien qu’il avot l’feu au plancher : sin pantalon arrivot à 20 cintimètes du sol ! Et comme s’maronne étot trop tindue à l’entrejambes, i n’arrêtot pos d’armett’ ses coucougnettes in plache ! Il avot l’air d’un clown ! Que de souvenirs !
Ch’étot l’mineute étymologique, historique, germanique et nostalgique ed’ Galibot
Saint-Dominique (de Silos): N'in v'là un saint qui m'plait bin.......
Vu que j'aros tindince à dev'nir hydrophobe sur mes viux jours!
Vu commint que te décris tin prof d'allemind, ch'est pos étonnant si yétot armeuré viux garchon!
"ya un élèfe qui a pris sin briquet su l’bureau et qui a mis la molette à fond. Quind l’prof a voulu ralleumer s’clope, i s’est cramé l’moustache et les caveux !"
In s'plaint des jones d'ach'teure, mais dins l'timps, ch'étot pos miux... Et si ein élèfe i f'sot cha aujord'hui, in in parl'rot à l'télé et in mettrot in plache ein' cellule pyschologique !
"Et si ein élèfe i f'sot cha aujord'hui, in in parl'rot à l'télé et in mettrot in plache ein' cellule pyschologique"
Mais comme il avot toudis s'prone, i s'est même pos rindu compte qu'un élèfe li avot fait eune blague ! il a simplemint pinsé qu'sin briquet étot déréglé !
J'l'ai eu comme prof 2 ans au collège. Quind j'sus parti au lycée, j'avos un niveau en allemand quasi-nul ! Mi qui étot un très bon élève dins beaucop de disciplines, j'me suis artreuvé dernier de l'classe in allemand ! J'm'étos installé, comme un cancre, au fond de l'classe in espérant à chaque cours, de n'pos faire interroger ! Ch'est là qu'j'ai compris c'que chétot d'ête un cancre ! Cha a fait drôlemint baissé ma moyenne générale ! Et j'ai failli rater min bac à causse de l'allemand !
Enfin, l'essintiel, ch'est qu'cha a fait des souvenirs ! In in parle souvint dins les réunions d'famile, car min frère et m'bielle-soeur l'ont égalemint eu comme prof ! Il in a fait des dégâts, ce zigoto !
Dictons du 21 déchimpe :
- S’il gèle à l’saint Thomas, i gèlera pour trois mois.
- A l’saint Thomas, in marie les filles aveuc les gars.
- A l’saint Thomas, les jours sont au plus bas.
- Pour saint Thomas, cuit tin pain, lafe tes draps, tue tin porc maique ou gras , té l’auras pos sitôt tué, qu’Noël sera arrivé !
- A l’saint Thomas, les jours tombés au plus bas vont demain grindir du pas d'un cat.
- Pou’ l’saint Thomas, alleume si té n'y vos pas.
- Saint Thomas apporte l'hiver dins ses bras.
-Edpuis 1969, Saint Thomas a été déplacé au 3 juillet ! Mais les dictons existent toudis et in n’peut pos les déplacer pasque cha n’voudrot pus rin dire. Si in dit le 3 juillet « A l ‘Saint Thomas, i gèlera pour trois mois » ch’est peu crédible !
Donc, in garde saint Thomas le 21 déchimpe ! Et ch’ti qui est pos contint, yaka mett’ sin cul au vint !
"Vu que j'aros tindince à dev'nir hydrophobe sur mes viux jours!"
Y'in a qui souffrent d'hydrophobie, y'in a d'autes qui souffrent de bièrophobie, mais y'in a qui ont la bièrofolie !
V'là un régime qui va t'plaire, Mozinpef !
Donc j'va dire au facteur qui va bétôt passer pou ses calindriers, qui n'a qu'à mette sin cul au vint, et que ch'est Galibot le néo-Kimberlot qui l'a dit!
"Et ch’ti qui est pos contint, yaka mett’ sin cul au vint !"
Galibot, faut dire l'espression in intier : yaka mett’ sin cul au vint, i aura d'l'air !
Dicton kimberlotesque : A l'Saint Thomas, tes coquiles ed Noë te f'ra !
Bin obigée d'in faire mi-même, in treuve pos cha in Sarthe...
Dictons du 22 déchimpe :
-A l’saint Gratien, l’temps n’vaut rien.
-Si déchimpe fait le tendre, cros-me l'hiver n'est pos loin, il est là à l’saint Gratien.
-Pleufe de sainte Françoise Xavière, de l’hiver ne s’ra pos l’dernière.
-Quind in hiver est été mais in été l'hivernée, cette contrariété n’fit jamais bonne année.
-Hiver doux, printemps sec.
-Nuées de septimpe, pleufe de novimpe, gel in déchimpe.
-Oraches de septimpe, neiche de déchimpe.
-Pleufe d'orache dins les Avents artarde l'hiver pour longtemps.
-Chaque cosse in sin temps, les navets et les choux pou l’mos d’l'Avent.
-L'hiver n'est bon que pour les choux et pour faire gagner la toux.
-Pour que l'année seuche de bon aloi, i faut que l’neiche arcouvre el sol neuf fois.
-Quind in déchimpe il a tonné, l'hiver est avorté.
-Serein hiver et pleufe d'été ne font jamais pauvreté.
- Sainte-Françoise-Xavier est l’patronne des émigrants, des orphelins et des administrateurs d’orphelinats.
Quéqu'un qui est mate, i'est rassis (comme ch'pain) ou i'est débistraqué !
J'ai vu dins un dico picard que: débistraqué i traduisent cha par: démonté.
http://memchau.free.fr/articles-sha...
Zut, ch'loïen i va pos! 
M'mère ale disot "rassis comme ein pain d'tros lifes" !
"M'mère ale disot "rassis comme ein pain d'tros lifes" " !
Si j'me réfère à un ancien billet...j'in perds min latin...
Faudrot savoir ! Ch'est 3 lifes, 4 lifes, 5 lifes ou 6 lifes pour ête rassis ?
http://www.chblog.com/post/2012/10/...
rassis té ,t'y verras pus clair !
Dictons du 23 déchimpe :
-Temps clément d’saint Armand, gare au retournement !
-Frissonnemint d’saint Armand, ch’est l’hiver pour longtemps.
-Vint hurlant à saint Armand, gare aux déracinements !
-Tin sapin, à saint armand, décore somptueusement.
-A saint Evariste, jour de pleufe, jour triste.
-Qui veut l'hiver avant la fin de l'an, in aura insuite deux fos autant.
-Déchimpe froid, si l’neiche abonde in eune année féconde, le laboureur a foi.
-Des neiches avec bon hiver mettent du bien à couvert.
-In déchimpe pour que l'année aille comme il se dot, il convient que les camps s'inneigent par deux fos.
-Année de givre, année de fruits.
-Saint-Dagobert II (Qui n’a rin à vir aveuc chti qui avot mis s’maronne à l’inviers !) est l’patron des personnes victimes d’enlèvemints et des familes nombreusses.
Armand DARINE travalle à l'météo! i' nous esplique dusse qu'y a les alertes ORANCHES !sacré Armand!
"Faudrot savoir ! Ch'est 3 lifes, 4 lifes, 5 lifes ou 6 lifes pour ête rassis ?"
Cha, ch'est ch'qu'in treufe dins chés lifes ed patois. M'mère, qui étot pos d'Kimbré mais d'Avesnes-lez-Go, disot tros lifes !
Tiens, justemint, à Avesnes-lez-Go, j'avos ein mononque Evarisse, ou putôt, ein mononque à m'mère ! Et sin fiu i s'appelot aussi Evarisse. Ch'est pos courant, ch' prénom-là !
Y'in avot un dins m'rue dins l'temps(fort avare) et pis un bia jour i'a contracté des varices insuite ed' cha i'a eu aussi la varicelle! et i'est pos mort ed'cha!
Bonne nouvelle em' finme sort ed' l'hopital J'sus fin bénache!bon noé à vouzotes!
Parfos in dit qui faut lutter contre eul' maladie! j'ajout'rai qu'i faut temporiser aveuc et printe patience...ch'est pos benin et perfos i' faut accepter bon gré malgré chu qu'in vous diagnostique ! alors voilà ej' j'vous rassure aveuc beaucop d'précautions em' finme va bin ! in affront'ra les difficultés aveuc tout c'qué chelà impose ! merci à vous !JOYEUX Noé!Merchi au personnel hospitalier pou' sins traval-dévouement !A bétôt mes chers amis pou' patoiser à nouveau!m'grind-mère dijot parfos: chti qu'i l'a pos i' l'attind ! et mi qui avos eune dizonne d'années j'répondot: faudra faire avec!Bon noé à tizeutes!LEON
Bon rétablissemint à t'finme ! A nos âches, ach't'heure, in s'rind compte que la santé ch'est not' bien l'plus précieux !
Dictons du 24 déchimpe :
- Ne va pos à l'écurie le vingt-quate déchimpe, cha porte malheur !
- Biau temps à sainte Adèle est un cadeau du ciel.
- Neiche de sainte Adèle, printemps fidèle.
- Intre sainte Adèle et saint Vincent (22 jinvier), les gelées ont puss ed’ mordant.
- A l’sainte Adèle, s'il fait frod, s'il gèle, alleume t’candelle et rejoint vite t’femme.
- Vint qui souffèle à l’sortie de l’messe de minuit dominera l'an qui suit.
- S'il fait un temps clair pindint l’messe de minuit, i fera clair dins l’grange.
- A l’sainte Hermine, passe la sauvagine.
- Saint-Adam est l’patron des gardiniers. Il est invoqué pour avoir du biau temps.
"Vint qui souffèle à l’sortie de l’messe de minuit dominera l'an qui suit."
Ach'teure, y a pus gramint d'messes ed minuit ! Ch'est putôt entre 17h (pou chés tiots) et 22h30 (à l'cathédrale) !
Mais du vint, pou l'momint, i n'd'a !
Et jo-yeux Noël à tertous ! Et ein' grosse baisse à chacun !
?
Faute de frappe!....joyeus'tés du réveillon à tertous et eine grosse baissein attidant la hausse des r'traites!
Les dictons du 25 déchimpe : Y in a puss qu'i n'in faut !!!
-Noël au balcon, Pâques au tison.
-Beaucoup d’paille et peu d’blé, quind Noël est éclairé.
-Leune de noël gouverne el temps jusqu'à l’saint Jean.
-À Noël les moucherons, à Pâques les glachons.
-Soleil à Noël, neiche à Pâques.
-À Noël la caleur, à Pâques la frodeur.
-Qui prind l’solel à Noël, à Pâques se gèle.
-Qui à Noël cache l'ombrier, à Pâques cache le foyer.
-Quind té prinds à Noël l'solel, à Pâques tu te rôtis l'ortel.
-Qui à Noël se cauffe au solel, à Pâques brûle la bûche ed’ Noël.
-Noël au jeu, Pâques au feu.
-Verte fiête ed' Noël, banque fiête ed' Pâques.
-Quind Noël est dins l'obscurité (sins leune), beaucop d’blé dins les camps ; quind -Noël est éclairé, beaucop de paille et peu d’ lé.
-Noël sans leune, sur trois brebis i n'in reste qu'eune.
-Pleine leune el' jour ed’ Noël, cherté ; votre jument vindez et du grain acatez.
-Claire nuit d’Noël, claires javelles.
-Les jours intre Noël et les Rois, indiquent el temps des douze mois.
-Quind Noël est étoilé, force paille, guère de blé.
-Quind Noël vient in clarté, vinds tes bœufs et t’carrette pour acater du blé.
-Le jour de Noël humide, donne guernier et tonniau vides.
-À Noël tonnerre, pos d'hiver.
- Quind pour Noël in s'insoleille, pour Pâques in brûle el bos.
- À l’Noël, les frods les plus durs font les épis les plus sûrs.
- Tel jour Noël, jour de l'an tel.
- De l’Noël jusqu'à jinvier, pelle verse tin chénevier.
- Noël porte l'hiver dins eune besace, s'il ne l'a pas devint, il l'a derrière.
- A Noël froid dur, annonce les épis les plus sûrs.
- Givre à Noël, cidre à foison
- Givre d'avint Noël nous vaut cint écus, givre ed’ janvier vaut moins d'un denier
- Noël sans leune, année à prones
- Quind Noël vient in clarté, vinds tes boeufs, acate du blé.
- S'il y a du givre la nuit d’Noël, y aura des pommes à pleines mannes.
- Pour Noël, les jours allongent d'un pas d’co, l’premier d’l'an, d'un pas d’galant, pour l'Épiphanie, d'eune heure et demie. ???
-Pleufe de sainte Eugénie met l’travailleur à gêne, mais si l’solel pompe de l'iau, ch'est signe de huit jours cauds.
-L’frod et l’neiche à Noël sont eune bonne nouvelle.
-Noël gelé, moissons grainées.
-S'il gèle à Noël au matin, l'aire sera chargée in grain.
-Leune de Noël gouverne le temps jusqu'à l’saint Jean.
-A l’Noël les mouquerons, à Pâques les glachons ; à Noël les glachons, à Pâques les mouquerons.
-Quind Noël fait "cri-cra" (sol gelé), in aura du grain ; Quind Noël fait "chi-cha" (sol boueux), beaucop d’pailles et peu d’grains.
-Noël humide, guerniers et tonniaux vides.
-Qui prind l’solel à Noël, souvint à Pâques se gèle.
- Biau temps à Noël est un présent du ciel.
-Blanc Noël, vertes Pâques, vert Noël, blanques Pâques.
-Si Noël est insoleillé, in dépinse du bos à Pâques.
-Quind in minge le gâteau au chaud (bûche de Noë) in mange les ués (de Pâques) derrière le fourneau.
-Quind in minge les bouquettes (tiotspains de Noël belges) à l’porte, in minge les cocognes (œufs de Pâques) au coin du feu.
-Beaucop d’paille et peu d’blé quind Noël est éclairé.
-Noël il est certain ne fut jamais bon marchand d’vin.
-Si té vos du froment à Noël, tue l’kien ! ; Si té n'in vos pos, donne-lui du pain.
-Quind Noël est sins leune de cint berbis i n'in reste qu'eune.
-A Noël, vaut mieux un leu dins les camps qu'un laboureu
-Le jour de Nadau, la pie creuse sin premier tro.
-Qui s’cauffe au solel, Noël, en tin saint jour, devra brûler du bos, quind Pâques aura sin tour.
-Quind pour Noël in s'ensoleille, pour Pâques, in brûle le bos.
-Noël grelottant, Pâques éclatant
-A l’Noël, frod dur, annonce les épis les plus mûrs.
-Noël gelé, moisson grainée ; Noël mol, moisson molle.
-A Noël grand vent, Fruits abondants.
-Noël porte l'hiver dins eune besace ; Quind il ne l'a pos devint, il l'a derrière.
-Ravisse commint sont menées edpuis Noël douze journées ;Car in suivant ces douze jours, les douze mois feront leur cours.
-Intre Noël et la Chandeleur, ya pus d’laboureur.
-Soir de Noël sombre, an d'ondées in grind nombre.
-Givre à Noël, cent écus dins votre escarcelle.
-Noël neigeux, Eté merveilleux.
-Quind Noël est étoilé force paille, guère de blé.
-Plus la lune est claire à Noël, plus de pommes belles.
-Noël un samedi, an où tout l’monte mendie.
-Noël un mardi, mauvais pour les semis.
-Noël vint un lundi, Et tout se perdit.
-Quind Noël tombe un mardi, pain et vin de toute parts. Noël le jeudi, ch'est la famine.
Mais s'il tombe un vendredi, l’blé roule sous la chinte ; Si l’jour de Noël s’trouve ête un diminche, les innuis d’l'hiver viendront in avalanche.
J’IN PEUX PUS !!!
J’ferai pos cha tous les jours !
Quo qu’j’ai gagné Mincoin, pour tous chés dictons ???
Ch’est l’record, non ?
JOYEUX NOEL A TERTOUS ET TERTOUTES !
Galibot, ch'Maîte in record de dictons !
I'a un truc qué voudros savoir maître!!In calcul j'ai toudis été mat !!Est'ce qué l'année deux e-mil vingt est eine année bicepstile ?..et pourquoé !!
Si réponse assurée:Dieu Merci !
Eh bin mi, aujord'hui, jour ed Noël, j'ai vu ein bourdon su ein cyclamen ed min balcon ! Ch'est bin l'première fos qu'cha m'arrife ed vir ein bourdon in hiver !!!
Ch'est incroyape !!les timpératures!!!in n'a pos vu cha d'pus jé n'sais quand!!!!J'viens d'aperchuvoir des larves ed' papillon su' l'terre qui vont bêtot éclore !du jinmais vu !!
"Est'ce qué l'année deux e-mil vingt est eine année bicepstile ?..et pourquoé !!"
Edpuis l’instauration du calindrier grégorien, dont j’ai d’jà parlé, l'année sera bissextile tous les 4 ans. Pour savoir si 2020 est bi-sexe-tile, il faut vir :
- Si l'année est divisipe par 4 et non divisipe par 100
- Obin, si l'année est divisipe par 400.
Ch’est comme cha qu’in a pu vir que 1900 n’étot pos bissextile mais que 2000 l’étot ! Et 2020 est bissextile car divisipe par 4 mais pas divisipe par 100 !
Le calendrier grégorien est calculé sur eune année moyenne de 365,2425 jours c’qu’i fait que tous les 4 ans, i faut eune année de 366 jours. Mais ch’est pos précis non pus car il arot fallu calculer sur 365, 25 pour qu’cha tompe pile ! Donc, i faudra dins l’avenir, i faudra supprimer 3 années bissextiles tous les 400 ans. Mais j’peux pos dire lesquelles ! Et j’m’in fous totalemint, vu qu’à ch’momint là, j’serai ad patres !
Dictons du 26 déchimpe :
-A l'saint Etienne, i fait l’même temps qu'in jinvier.
(Les 12 jours intre Noël et les Rois indiquent el temps des 12 mos à venir)
-A l’saint Etienne, les jours croissent d'eune aiguillée d’laine.
-A l’saint Etienne, chacun troufe la sienne.
-A l’saint Etienne, s'il neiche, l'hiver sera frod et neigeux.
-Caleur de saint Etienne appareille la treille.
-Le jour de l’saint Denis, l’vint s’marie à minuit.
-Pleufe à saint Denis, tout l'hiver la pluie.
-S'il pleut à l’saint Denis, l’hiver s’ra humide et sins glache.
-S'il pleut l’jour de saint Etiole, i n'est pos de babioles.
-Saint-Étienne est l’patron des diacres, des machons et des fabricants d’urnes funéraires. Il est l’protecteur des g’vas et est invoqué pour soulager les maux d’tiête.
Etienne, ch'est ein prénom qui vaut miux éviter d'donner à sin fiu dins l'Kimbrésis, pasque cha s'prononce "Etchienne" ! Ch'est pos fort biau...
Mi aujord'hui, j'sus mate ! J'ai r'chu mes infints et mes tiots-infants pou Noël ! Faire el ménache, faire el cuisine, faire el bûche et l'entrennes, mette ein' rallonge à l'tape, décorer l'mason et l'tape, servir, et pis apreu tout ringer, faire el vaisselle, el lessife, ein' tiot cop d'wassingue, j'in passe et des meilleux, et tout cha pou mi tout seu ! Heureus'mint qu'min fiu m'a aidé à finir ed préparer les plats et m'file à rimplir ch'lave-vaisselle ! Et heureus'mint qu'in a passé ein' bonne jornée, et qu'in a eu d'biaux cadeaux au Père Noël ! Ch'sais bin qui faut user les viux avont les jones, mais quind même !
Dictons du 27 déchimpe :
-A la saint Jean, s’arnouvelle l'an.
-S'il pleut à la petite Saint Jean, toute l'année s'in ressent, jusqu'à l’grande Saint-Jean.
-S'il pleut à la petite Saint Jean, année fructueuse in froment, jusqu'à l’grande Saint-Jean.
-Intre les deux Saint Jean les nuées vont contre eul vent.
-S’il pleut à l’Saint Jean caude, les biens de l’tierre gâtés jusqu’à l’autre.
-Si déchimpe est sous l’neiche, l’récolte s’protège.
-In hiver, plus même qu'in été, est incommode d'ête paufe.
-Quind l'iau sort au mois mort, toute l'année, ale sort.
-Quind tompe eul neiche s'ingraisse eul tierre.
.
Quo qu’ch’est donc la petite saint Jean et l’grande saint Jean ?
Ya deux saint Jean, selon les solstices : :
-Saint Jean Apôtre : Selon la mite au logis mythologie populaire, ch'est "Jean qui rit" car il vot l’solel arvenir et armonter dins l’ciel.
-Saint Jean Baptiste ch’est "Jean qui pleure" qui, six mos plus tard, vot l’soleil arpartir et deschindre.
Jean apôtre n’est pos barbu (comme l'aspect glabre de l’tierre in hiver, sans végétation). Par contre, Jean-Baptiste est velu (sin aspect rappelle eune végétation abondante).
Jean l'apôtre et Jean-Baptiste s’partagent les deux portes solsticiales. Cha rinvoie au Dieu Janus qui détenot les deux clefs de ces portes. Janus est l’Dieu à deux tiêtes : une tournée vers l'année qui s’meurt et l'aute tournée vers l'nouvielle année.
Saint Jean l’apôtre étot sûremint un tiot peu porté sur la dive boutelle car ch’est li qui a demindé à Jésus de trinsformer l’iau en vin.
Saint-Jean est l’patron des professionnels du livre (libraires, éditeurs, auteurs, relieurs, imprimeurs, etc.), des compositeurs, des tanneurs, des théologiens et des écrivains. Il est invoqué contre les risques d’empoisonnemint.
"Mi aujord'hui, j'sus mate ! J'ai r'chu mes infints et mes tiots-infants pou Noël !"
Bin, mi, ch't'année, in a archu toute eul famile belche et l'famile frinçaise in même temps !
Vindiouss ! Ya fallu bouger les meupes pour caser tout l'monte !
J'avos fait eune intrée froide (huitres et assiette nordique), eune intrée caude (ma spécialité de "crabes farcis à la martiniquaise") (Ch'est du boulot !), puis chapon farci aveuc divers accompagnemints. Puis fromaches de ch'nord et bûche glacée.
In a passé eune excellinte jornée !
Mais j'sus pos cor' remis...
Mi parel, j'émerge seulemint. Chelle nuit j'ai dormi onze heures d'affilée! 
Ch'est là qu'in vot qu'in n'a pus 20 ans;
In fézot tros jours d'suite, la bringue, et i fallot 1 jour pour s'armette!
Acht'heure ch'est l'inverse: 1 jour ed bringue, tros jours à s'in r'mette!
Mi j'in veux au champane!!!J't'ai chi des yux qui grattent comme de l'toile emeri!!j'avos réussi à m'el'ver mais j'éteus tell'mint mate qué j'mé sus rindormi deux heures d'affilée!IN PUS j'ai d'l'imbarras gaz trique avec des rinvois sûrs !!
Les rinvois sûrs, ch'est souvint à causse des digestifs à la fin; mi, edpuis que j'ai arrêté d'in prinde, et j'ai pus d'armontées acites!
Pour résumer, si j'comprinds bien, les problèmes digestifs sont dus aux digestifs !!?
Donc, pourquo in appelle cha des digestifs ?
Comme digestif, i ne m'reste pus qu'eune tiote Poire du Jura, distillée clandestinemint. Ch'est un vrai régal ! Et comme ch'est pos trafiqué, cha s'digère tout seu !
Et j'me souviens du rhum "Coeur de chauffe" in Martinique qui devot titrer dins les 60° ! Cha s'digérot tout seu aussi !
Et je n'parle pos du rhum qui sortot d'l'imminse alambic de l'distillerie La Mauny : 72°. Quind j'avos visité l'distillerie, le guide nous a fait goûter et a dit : "Vous pouvez tous boire dins l'même verre ! Tous les microbes sont morts!"
Au rayon spécialités polonaises à Auchan Hénin, te peux acater du "Spirytus" à 96°!
ch'est imbuvape .
Je n'd'ais eune boutelle edpuis 20 ans, ale est incore aux 3/4.
Ale sert juste à rabatte l'caquet aux forts in gueule, qui disent que pour eusses, ya rin d'trop fort!
Bien vu Mozinpef!et pour les personnes qui ont de l'douceur comme Kimberlotte "la liqueur du couvent" y a rin d'tel !
J'connos pos " la liqueur du couvent"... Mi, l'seule goutte que j'bos, ch'est l'crème ed cassis ! Dins mes réserfes, j'ai plein d'alccols forts edpus pus d'vingt ans ! Ach'teure, chés ginss i veul'tent pus in boire pou pos risquer d'perde des points ou leu permis... Alors des fos, j'm'in sers pou l'pâtisserie. Ch't'année-chi, j'ai pris du g'nièfe pou arroser l'biscuit de m'bûche ed Noël ! Ch'est comme l'rhum, ch'est pou l'z'entrennes et pou quéques desserts.
"te peux acater du "Spirytus" à 96°!ch'est imbuvape."
T'as rin compris, Mozinpef ! Ch'est pos pour boire ! Ch'est pour désinfecter les plaies !
Dictons du 28 déchimpe :
-Aux Saints Innocents, i f’ra l’même temps qu'in mars.
-Vint glaçant des Saint Innocents, hiver grimaçant.
-Aux Saint Innocents, souvint l’hiver met l’accent.
-Ciel blanchissant aux Saint Innocents, l’frod est sous-jacent.
-Neicheaux Saint Innocents, l’gardin est ravissant.
-Neiche de saint Gaspard, ch’est de l’hiver le départ.
-A la saint Gaspard, gardinier repose-te, rien n’t’accapare.
-S'il neiche à l’sainte Eléonore, les récoltes seront d'or.
-Les souris qui creusent trop bas, les fourmis qui bâtissent trop haut, présagent un hiver peu caud.
Saints du 28 déchimpe :
Les Saints Innocents, commémorent le massacre des infants innochints par Hérode qui voulot tuer l’tiot Jésus qui venot de naître. Comme i savot pos dù qu’il étot muché, il ordonna donc de tuer tous les infants qui venotent de naitre.(I paraitrot qu’il in a fait tuer intre 4 000 et 140 000 ! In n’sait pos trop combin exactemint ! (Parel quind ya des manifs, ch’est pos l’même chiffre intre les syndicats et l’gouvernemint !)
Mais il n’a pos pinsé qu’les soldats allotent tuer sin propre tiot-fieu qui venot de naître aussi ! « Un ordre, ch’est un ordre ! » ont dit les soldats. Mais cha n’a pos affecté Hérode plus que cha ! L’amour familial, ch’étot pos sin fort !
Un jour sin fieu Alexandre s’est moqué d’sin père in disant qu’ch’étot un vieux beau qui s’teignot les caveux pour paraître plus jeune. Vexé, Hérode fit donc tuer sin fils Alexandre. Il in profita même pour tuer sin deuxième fils Aristobule qui ne li avot rin dit.
Sin trosième fils tinta d’impoisonner sin père. Hérode s’in débarrassa aussi. Ch’est qu’in rigolot pos à l’époque !
A l'âge de 70 ans, Hérode tomba gravemint malate. Non seulemint il avot l’fièf’ mais sin corps pourrissot d’partout, ses coucougnettes étotent rongées par les viers. In l’mit dins un bain d'huile et il in sortit presque mort. Dins l’palais, in crût qu'il étot mort.
Aussitôt, sin fils Antipater exulta de joie ! I dansot tellemint i’étot contint. Seulemint, Hérode n’étot pos mort et in apprenant qu’sin fils étot contint, il le fit donc tuer aussi! Et de quatre !!! Faites des gosses !
Ah ouais, j’allos oblier de dire qu’il avot aussi tué sa sixième épouse ! In n’est pus à cha près !
Il mourut gangréné par la maladie, avec des viers qui sortotent de partout et il puot pire qu’eune tonne de maroilles exposée pindint 15 jours in plein solel ! Personne ne voulot l’approcher ! Bin fait pour li !
Les Saints-Innocents sont les patrons des nourrissons, des infants abandonnés et des infants d’chœur.
Et qui ch'est qui va gagner un magnifique cadeau de Noël offert par Mincoin pou l'100ème commintaire ???
Gaaaaaaaallllllliiiiiiibbbbbbbooooooootttttt ! Evidemmint !!!!
bin sûr !! ch'est mi !
"Et qui ch'est qui va gagner un magnifique cadeau de Noël offert par Mincoin pou l'100ème commintaire ???"
Pou ein' fos, aveuc tin 99ème commintaire à rallonche, te l'as bien mérité !
Derniers commentaires