mar.13
dans la catégorie Dictons, expressions
Dins l'temps, in faijot boulir ch'lait, comme cha in tuot chés micropes qui étotent ed'dins.
Dans le temps, on faisait bouillir le lait, comme ça on tuait les microbes qui étaient dedans.
Fil des commentaires de ce billet
Pou faire boulir ch'lait, y avot ein couet chpécial aveuc ein' espèce d'couvercle à treus pou impêcher l'lait de s'sauver. Et quind ch'lait i étot bouli, cha f'sot ein' piau pad'zu l'couet. Beurk !
Quind in versot ch'lait dins l'café, fallot ein' passoire pou pos que l'piau ale quait aveuc. J'ai core l'passoire de m'mère. Ale a l'forme d'ein' fleur !
Bin ouais, in l'faisot bouillir pasque i v'not directemint de l'cinse, et in n'parlot pos d'salmonelle, d'listéria comme acht'heure! 
Ya core pas si lontimps d'cha, j'ai d'z'amis à Marcoing, qui allottent queure ch'lait à l'cinse et qu'i l'faizottent bouillir. I récupérottent l'piau au d'sus, et quind i n'avottent assez, i faizottent eune tarte au libouli aveuc!
J'm'ais toudis régalé aveuc leus tartes, mais quind j'ai su bin pus tard qu'ale étot faite aveuc l'piau d'lait, j'in sus resté baba!
Bon, acht'heure, vu que l'cinsier ya vindu ses vaques, i z'acatent du lait in boutelle, et ya pus d'piau!
Horeuz'mint!
Bonsoir tout l'monte !
Ch'est mi qu'arvl'à ! 
Merci beaucop, chers camarates qui n'ont pos oblié min anniversaire !
Ch'est d'ailleurs pour cha qu'j'étos absint de ch'blog ! M'femme m'a offert un ouiquaine de milieu d'semaine à Honfleur ! J'adore cette ville que j'avos pos revue edpuis eune vingtaine d'années. Et j'ai kerre égalemint le Calvados ! Le départemint évidemmint (et l'tiot calva fabriqué là-bas) !
Evidemmint j'in ai bu mais pos d'quo avoir eune prone !
Pasque l'prone, j'vas l'archevoir dins quèques jours, vu qu'j'ai été flashé à 140 sur l'autoroute ! 
J'sus pos soupe au lait mais aveuc tous chés radars, l'gouvernemint nous prind pour des vaques à lait !
J'vus armets les dictons du 12 march, vu que j'les avos préparés la veille, mais j'avos pos pu les invoyer !
Dictons du 12 march :
-A l’sainte Justine, toute fleur s'incline.
-A l’sainte Justine, l’vint nous turlupine. (Cha ch'est bin vrai !)
-Si l’hiver s’obstine à l’sainte Justine, laiche in plache les tontines.
-Solel de sainte justine, gardine, mais n’oblie pos tes bottines.
-A l’sainte Justine se révelle l’églantine.
-A l’sainte Justine, taille les clémentines.
-Si té veux m’in croire, tonds l’mouton à l’saint Grégoire.
-A l’saint Grégoire, tailler sa vigne, ch'est d’l'or.
-De l’saint Jean de Dieu à l’saint Grégoire, vints et giboulées font notre désespoir.
-Le jour de saint Pol, l'hiver se rompt le col.
- A l’saint Marius, in vot clair à l'angélus
-S'il pleut ou vinte le 12 march, i pleuvra ou vintera pindint 40 jours.Cha craint ! Pasque du vint, i n'da eu beaucop !
Et pour ête à jour, v’là les Dictons du 13 march :
-A la sainte Euphrasie, sur ses bourgeons in s'extasie.
-A la sainte Euphrasie pointe la fraise.
-Pleufe de saint Rodrigue fait le gardin prodigue.
-Temps sec de saint Rodrigue, tin potager déjà irrigue.
-A la saint Rodrigue, traite tes arpes, car les insectes intriguent
Houla-là!!!Par tous les saints!!!l'lait i' débuque su' poèle cha sint l'roussi!!!queulle finquière !!!Houp! là!yoplait !Bonne journée à tertoutes et touss'!surtout n'prenez pus l'avion pou' vos vagances...faites du vélo et perdez votre ethylo...
...Un tandem!!ou bin un tricycle ch'est 'cor c'qui a d'miux!!
Cha, faut l'faire:
Ya plus du mitan des radars qui z'ont été démolis, et té treuves l'moyen de t'faire flacher!
T'as pus qu'à payer, d'toutes façons, in est des vaques à lait pou l'état!
...i' resqille partout et démolit tout!!L'tarte est cuite; l'cat i'a mié l'burre!i'a pus qu'à faire comme sin homoloque Adgé..rien partir in r'traite aveuc es' finme sous la pression du peupe in rache !...J'viens d'freumer mes ferniêtes in nous annonce l'arrivée massive ed' partidcules fines et d'eine nouvel amococadix in gazcogne !
J'avos pos vu que t'avos déjà parlé des vaques à lait, toujours est-il qu'à forche de traire l'vaque à lait, in tue la poule aux oeufs d'or!
I'a traire et traire mais à forche ed' tirer su' l'pis;l'pis i'est dins l'séau !Tout cha ch'est laid !
Dictons du 14 march :
-Pleufe de sainte Mahaut n'est jamais trop.
-Chèvrefeuille planté à sainte Mathilde fleurit dès sainte Clothilde (4 juin).
-Groseillier taillé à sainte Mathilde se déguste dès Sainte Clotilde.
-Laitue semée à sainte Mathilde se récolte à sainte Clotilde.
-Pâquerettes fleuries à sainte Mathilde, chardons à sainte Clotilde.
-Taille tes buis à la sainte Mathilde, un cordeau te servira de guide.
-De saint Thomas à sainte Mathilde, l’temps est à la neiche souvint.
-S'il neiche à la sainte Mathilde, l'été sera aride.
-A la saint Arnaud, in reste près du fourneau.
-Gardine tout tin saoûl à la saint Lubin puis prinds un bon bain.
-L’printemps,à saint Lubin ,l’plus souvint se fait lambin.
-Soleil de saint Lubin, souvint n’est qu’un chauffe-bain.
In parlot de l'piau su l'lait bouilli. Mi, j'avos querre cha quind j'étos tiot !
J'avos treuvé un truc : j'faisot bouillir l'lait au maximum, sins qu'cha déborde, mais pour que cha fasse el maximum ed piau.
Après, quind l'piau étot bin arfroidie, j'la mettos dins un bol et j'rajoutos du cacao in poute !
J'mélingeos tout cha et cha faisot eune mixture que j'étalos sur eune tartine. J'avos invinté l'Nutella du paufe !
- Ravise me cha ! Eul lait ya core débordé ! J't'avos pourtint demindé d'raviser t'montre !
- Ben, ch'est c'que j'ai fait ! Quind l'lait a débordé, il étot exactemint 8h 39 !
J'me rappelle qu'in mettot eune soucoupe in verre: un "anti monte-lait" au fond de l'castrolle pour pos que ch'lait i s'sauve; Quind cha s'mettot à bouillir, cha fézot du bruit, et in savot qu'i fallot freumer ch'gaz!
Hier j'ai vu l'copain Zébulon!!!I'a cangé d'look !nom dé djiu!!l'z'internautes !!!
A dé !
Pou faire ein' tarte à libouli aujord'hui, j'ai fait cauffé du lait dins ein'castrole. I a pos débordé, mais i a attaché au fond de l'castrole. J'arrife pus à ravoir l'fond ! Faut dire qu'aveuc m'n'accidint, j'ai pu d'forche dins min bras droit... 
Mais cha n'aurot pos arrivé si t'avos mis eune soucoupe au fond de l'castrole !
Obin, pour éviter qu'cha crame, t'as l'viux truc de passer l'castrole sous l'iau froide avint de mett' du lait ed'dins ! Attintion ! Surtout ne pos l'essuyer !
Sinon, pour ravoir l'fond qui est brûlé, faut laisser trimper aveuc mitan iau, mitan vinaique blanc. Normalemint, cha dot s'in aller. Si ya core des traces, refaire un nettoyache au bicarbonate de soute ! Radical !
Un Belche est mort in buvant du lait !
La vaque s'est assise !
Quind j'étos tiot, m'mère ale faisot pindint l'hiver du "lait d'poule", ch'étot du lait sucré aveuc un jaune d'eu.
Yavot eune variante avec du café: cha s'appelot un "chaudeau".
Dictons du 15 march :
-S’il gèle à la saint Zacharie, l’paysan rit.
-A la saint Zacharie, y a des corbeaux gris.
-A la sainte Louise, l’hiver fait ses valisses ou vous mord d’eune bise.
-A la saint Zacharie, pointent les premiers muscaris.
-Trop de pleufe à la sainte Louise, gardinier barbote dins l’mouise.
-Gelée de sainte Louise, du jardiner est la hantise.
-A la sainte Louise, gardine à t’guise.
-Plinter à la sainte Louise assure eune bonne reprise.
-A la sainte Louise, tin potager fertilise.
-Fleurs de cerise à la sainte Louise, récolte compromise.
-Orache du jour de saint Tranquille troufe le moissonneur agile, mais si la pleufe devot durer, ale le ferot bétôt jurer.
-Saint Longin le Doryphore, appelé aussi, populairemint "Saint Long j'y vas" est l’patron des pieds plats.
-A la mi-mars, l’coucou est dins l'épinard : Cha mérite eune esplication :L’épinard du dicton est in fait la pariétaire, eune plante officinale, dont l’coucou raffole au printemps car ses feulles, un peu gluantes et odorantes, attirent les insectes qui s’y collent … A ch’t’époque là, l’coucou reprind des forches pour préparer s’ponte. J’sais pos s’il a b’soin de tint de forches que cha, puisque l’femelle coucou va pondre dins l’ nid d’ z’autes zoziaus ! Sale biête !
Ch’est quind même curieux quind in y pinse : in dit : «Le lait i s’sauve !» Comme si in l’poursuivot !
Cha s’rot plus logique ed' dire : «Le lait i déborde !»
"Quind j'étos tiot, m'mère ale faisot pindint l'hiver du "lait d'poule", ch'étot du lait sucré aveuc un jaune d'eu."
Malheureux ! T'as oblié l'principal : le rhum viux ! Et eune pincée d'canelle ! Cha, ch'est du vrai lait d'poule !
Uniquemint pour les adultes ! Ch'est pos pour les z'infints...
"Se sauver": Dins min coin, in dit cha aussi pour dire que le mari ou la femme a quitté le domicile conjugal.
- "Tins, te l'savos que l'femme à Untel ale s'a sauvé aveuc l'homme de s'visine?"
Ch'a m'a toudis fait marrer!
Dictons du 16 march :
-March acate l’pelisse de s’mère et tros jours après la revind.
-In mai rosée, in march grésil, pleufe abondante au mos d'avril, le laboureur est contint plus que ne ferotent chinquante écus.
-March pluvieux, disette d'œufs.
-March qui rit, malgré les draches, prépare in secret l’printemps.
-L’mouviard qui a bin hiverné, in march a s’nichée.
-Ya pos d’dictons spécifique aujord’hui, juste deux saints à signaler : Sainte Eusébie qui est de not’ coin : ale passa s’vie au monastère de Marchiennes et Sainte-Grégoire de Nicopolis qui est invoqué pour soulager les douleurs provoquées par les piqûres d’insectes.
Pour impêcher que l’lait ne s’sauve, mais pour quind même arriver à le stériliser, un Belche avot imaginé eune solution formidape. Mais l’pauf’, in mettant s’n’idée à exécution, il in est mort ! Il a pris un cop d’sabot de l’ vaque.
Commint qu’cha s’fait que l'vaque n'a pos aimé l'idée ?
Pasque s’n’idée formidape, ch’étot d’faire bouillir les pis !
-Ya pos d’dictons spécifique aujord’hui
Déjà, t'aros mis un "S"à spécifique, cha arot été miux!;)
Insuite, Grégoire de Nicopolis, ch'étot un homme;
Et pourtint, j'ai treuvé un dicton:
-"Le ciel de Sainte Bénédicte, au jardinier ses commandements dicte."
Ch'est pos tin jour aujord'hui!
Et d'main, ch'est l'Saint Patrice, l'fête aux Irlandais. Ch'sais pos pourquo, mais ach't'heure in l'fête partout in France. Ichi, ch'est la folie ! L'Saint Patrice par chi, l'Saint Patrice par là, dins chés cafés, dins chés restaurants, dins chés salles ed fête... Ch'est-ti parel dins ch'Nord ?
Ch'est putôt St Patrick, qu'i fêtent chés Irlindais, mais ch'est l'même jour que Patrice!
Ouais, dins ch'Nord ya gramin d'bars qui font eune soirée d'la St Patrick.
Dins chés bars qui fêtent l'St Patrick, chés buveux i vont boire du p'tit lait tout l'soirée, à l'différince près que ch'pétit lait yara eune couleur noire: Bin ouais, lait in irlindais, cha s'dit: "GUINNESS"
Ch'est putôt St Patrick
Bin sûr, in Irlande, ch'est l'Saint Patrick ! Mais in fait, in peut dire la Saint Patrick ou la Saint Patrice. Su les affiches, j'ai vu aussi "St Pat'" ! Et souvint, "Saint Patrick Day". Ch'est là qu'Mozinpef i s'étoque !
J'm'étoque tous les jours!
Ya pas 1 jour si i n'a un nouviau inglicisme qui apparait!
Pas pus tard qu'i a eune paire d'heures, sur FR3: ch'étot des jeunes, qui ont fait eune marche pour la planète (che que j'approufe), mais i z'ont fait une "CLEAN-WALK"
Cha veut dire qu'i z'ont marché in ramassant les ordures qui trainottent par tierre.
Ouais, et dins l'manif des gilets jones, y avot des "street medics" ! Autremint dit, la Croix Rouge...
Et les casseurs, ch'est des "black blocs"...
Qué misère !!
Aujord’hui comminche « la Semaine Internationale de la courtoisie au volant » ! Formidape ! Je suis très respectueux de cette semaine !
Mais i faudrot p’tête que l’tiot jonne qui m’a copé l’priorité au rond-point c’t’aprèm’ le sache ! Pasque ce tiot enfoiré, c’t’agozil, ya de l’chance que ch’étot la semaine de l’courtoisie pasque sinon i m’aurot intindu ! Andoulle ! Il a core du lait au bout d’sin nez et i refuse la priorité ! Et in puss, i rigole ! Ch’est l’goutte d’iau qui a fait déborder l’vase ! Et ch’est pire que le lait qui déborde de l’castrole ! Tiête ed’ sot, va !
Ch'tiot jone i étot pressé; Pt'ête qu'i avot du lait su ch'fu?
Dictons du 17 march :
-Quind i fait doux à l’saint Patrice, de leurs tros sortent les écrevisses.
-A l’saint Patrick, le printemps revindique ou l’hiver pique.
-Saint Patrick lunatique, d’un doux printemps est un bon pronostic.
-Si saint Patrick reste stoïque, l’printemps souvint est fantastique.
-Sème tes pos à l’saint Patrice, t’in auras à tin caprice.
-Narcisses qui fleurissent à saint Patrice, du printemps annoncent les délices.
-A l’saint Patrice, les premiers narcisses fleurissent.
-A l’saint Patrice, de l’été plinte les lis.
-A l’saint Patrice, dins sin pot, oblie l’amaryllis.
-A l’saint Patrick, rimpote tes plantes exotiques.
-A l’sainte Gertrude, la caleur sort ed’ tierre.
-A l’sainte Gertrude, plinte tes choux.
-Gertrude amène les cigognes, Barthélémy (le 24 août) vide leur nid.
-Le jour de sainte Gertrude, bien se fait faire saigner du bras droit,
ch’ti qui ainsi fera chette année, les ziux clairs aura.
-Sainte Gertrude, jamais les plantes frileuses ne dénude.
-Vint du sud à sainte Gertrude, fruits in décrépitude.
-Saint Patrick est d’not’ coin car il serot né à "Bonaven Taberniae", à côté d’Boulogne sur mer, et insuite enlevé, puis vindu comme esclave in Irlande par des pirates saxons. Il est invoqué pour faire fuir les serpents, pour ne pas être victime d'eune de leurs morsures et pour soulager l'ophidiophobie (la peur des serpents).
-Gertrude, née in Belgique, fut chanoinesse. Ale est invoquée contre les rats, les souris, les loirs et les mulots, pour les chats, pour un bon gîte in voyage, contre eul fièf et l’folie ; Patronne des voyageurs et des gardiniers ; Ale est la patronne des agonisants. Ya un dicton qui dit : "Madame Gertrude te prépare le quémin".
"Bin ouais, lait in irlindais, cha s'dit: "GUINNESS""
Ch'est pasque les vaques irlandaises mingent du houblon, et quind in les trait, ales donnent de l'bière !
Ch'est comme qu'i disot Jean Carmet:
-"J'borai du lait quind chés vaques mingeront du rojin!"
♫ Vive le vin, vive le raisin ♪
Vive le lait de la vigne ♫
Dictons du 18 march :
-Au solel de saint Cyrille, l’rossignol lince ses trilles.
-A l’saint Cyrille, gelée n’est que peccadille.
-A l’saint Cyrille, eune fleur blanque pour mille.
-Taille à l’saint Cyrille et n’laiche pus eune brindille.
-A l’saint Cyrille, taille les myrtilles.
-A l’saint Cyrille, traite contre les chenilles.
-A saint Alexandre, adieu les cendres.
-Saint-Alexandre est invoqué pour ralentir l’affaiblissement des facultés intellectuelles provoqué par le vieillissement.( Betôt, in va souvint l'invoquer… )
-Et pis ch’est l’fiête à St-Mérole, un saint que Kimberlotte dot connaît' puiqu’il étot évêque du Mans (+ vers 785) In invoque Saint-Mérole pour faire fuir les cambrioleurs.
L'ECONOMIE espliquée avec deux vaques à lait :
SOCIALISME :
Vous avez 2 vaques et vous in donnez eune à vot’ visin.
COMMUNISME :
Z’avez 2 vaques, le gouvernemint vous les prind et vous donne un tiot peu d’lait.
FASCISME :
Z’avez 2 vaques, le gouvernemint vous les prind et vous vind un peu d’lait.
NAZISME :
Z’avez 2 vaques. Le gouvernemint vous les prind et vous tue
BUREAUCRATIE :
Z’avez 2 vaques. Le gouvernemint vous les prind, en tue eune, traite l'aut’ et jette le lait.
CAPITALISME :
Z’avez 2 vaques Vous in vindez eune et acatez un taureau. Vous les laissez s’arproduire et quind l'économie monte, vous vindez tout et retirez l’bénéfice
ENTREPRISE AMERICAINE :
Z’avez 2 vaques. Vous in vendez eune et forcez l'autre à produire autint d’lait que 4 vaques. Plus tard, vous imbauchez un consultant pour analyser pourquo l’vaque est morte.
ENTREPRISE JAPONAISE :
Z’avez 2 vaques. Vous les reconcevez pour qu'elles fassent 1/10 de l’taille d'eune vaque normale et qu'ales produisent 20 fos puss ed’ lait.
Vous créez insuite un dessin animé appelé VaqueKemon et le commercialisez dins l’monte intier.
ENTREPRISE ALLEMANDE :
Z’avez 2 vaques. Vous les reconcevez pour qu'ales vivent 100 ans, mingent eune fois par mos et se traient elles même.
ENTREPRISE ITALIENNE :
Z’avez 2 va vaques mais vous ne savez pos dù qu’ales sont, et allez vous intraîner à juer au football in trichant pour gagner l’prochaine coupe du Monde.
ENTREPRISE RUSSE :
Z’avez 2 vaques, vous les comptez et in trouvez 5. Vous recomptez en in trouvez 42. Vous recomptez incore eune fos et en trouvez 2. Vous arrêtez d’compter et ouvrez eune aute boutelle ed’ vodka.
ENTREPRISE SUISSE :
Z’avez 5000 vaques et aucune ne vous appartient. Vous facturez les propriétaires pour garder leurs vaques.
ENTREPRISE CHINOISE :
Z’avez 2 vaques, vous avez 300 millions de gins pour les traire. Vous clamez qu'il y a le plein emploi, eune grande productivité bovine et arrêtez le journaliste qui a donné les chiffres.
ENTREPRISE INDIENNE :
Z’avez 2 vaques, vous les adorez et tout l’monte meurt ed’ faim chez vous
ENTREPRISE ANGLAISE :
Z’avez 2 vaques, elles sont toutes les 2 folles.
ENTREPRISE FRINCAISE :
Z’avez 2 vaques. Vous faites grève car vous in voulez 3 !
ENTREPRISE CH’TI :
Z’avez 2 vaques…A vous d’trouver la suite !
ENTREPRISE CH’TI :
Z’avez 2 vaques…A vous d’trouver la suite:
Bin si cha s'rot mi, j'les mets in pâture dins l'Avesnois, et aveuc ch'lait j'fais du bon fromache: du "Maroilles A.O.C"! 
Dictons du 18 march :
-Pou l’saint Joseph, chaque osiau bâtit sin câtiau.
-Pou saint Joseph, s'éveillent l'orvet, le lézard et l'abeille.
-A l’saint Joseph, biau temps, promesse de bon an.
-Saint Joseph au biau, toute l’année au biau.
-Le caud à l’saint Joseph l'été sera bref.
-Temps clair à l’saint Joseph, miellée abondante.
-Pou l’saint Joseph, min cousin, taille les arpes du gardin.
-Frod à l’saint Joseph, annonce pour bétôt la neiche.
-A l’saint Joseph, va et vient l'hirondelle.
-Si l’vint s’lèfe le jour de l’saint Joseph, la mer se couvre d’écume
-Qui veut bonne meulonnière, à l’saint Joseph dot la faire.
-A l’saint Joseph, sème les premières fèves.
-Sème les onions à l’saint Joseph, i seront gros comme tes fesses !
-Saint Joseph est invoqué par ceuss qui cachent un logis, par les fuyards et par ceuss qui sont in tentation d'adultère. Il est aussi l’patron des voyageurs, des émigrants, des ingénieurs, des charpentiers et de tous les travailleurs in général. Il est l’protecteur des femmes enceintes et il est invoqué pour venir in aide aux personnes qui doutent. In l'invoque aussi pour incourager les gouvernemints à faire preufe de justice sociale !
"In l'invoque aussi pour incourager les gouvernemints à faire preufe de justice sociale !"
Saint Joseph, nous, paufes artraités, t'invoquons : Fais quetcosse pour que l'gouvernemint nous supprime l'augmintation de l' C.S.G et qu'in artroufe not' pouvoir d'achat ! Amen !
- Dis P’pa, combin ya d’laits différints ?
- Ya le lait entier, demi-écrémé, écrémé, vitaminé, concentré... pourquo té demindes cha, min fiu ?
- J’dessine eune vaque, alors je voulos savoir combin d’robinets i faut mett’ !
Quind in étot tiot, in cantot :
"Ein' vaque qui pisse dins in tonniau
Ch'est rigolo mais ch'est salaud !"
Histoire perpétuelle
La vache a deux sous-produits : le lait et la bouse. Le lait, ce n'est pas intéressant. La bouse, alors...
Ou elle tombe sur la route, ou elle tombe sur le trottoir. Elle tombe sur la route, ce n'est pas intéressant. Elle tombe sur le trottoir, alors...
Ou tu la vois, ou tu ne la vois pas. Tu la vois, ce n'est pas intéressant. Tu ne la vois pas, alors...
Ou tu marches dedans, ou tu ne marches pas dedans. Tu ne marches pas dedans, ce n'est pas intéressant. Tu marches dedans, alors...
Ou tu glisses, ou tu ne glisses pas. Tu ne glisses pas, ce n'est pas intéressant. Tu glisses, alors... tu cries : oh ! la vache !
A deux sous-produits, etc.
Scusez-mi, mais j'ai pos eu l'courache de l'traduire in ch'ti... 
Blague à faire:
Té dis à un copain:
-Prononce le mot "blanc" très vite, 20 fois de suite sans t'arrêter.
Quind ya fini, t'inchaînes aveuc eune question:
-Qu'est-ce qu'elle boit, une vache?
Ya des grandes chances que tin copain i répondes:
-Du lait!
Dictons du 20 march :
-Quind i gèle le vingt march, i gèle toute l'année.
-A l’saint Herbert, les abris d’hiver in libère.
-A l’saint Herbert, laboure gardinier, mais ménage tes lombaires. (Ch’est bin vrai, cha ! Attintion, Maîte gardinier Mozinpef !)
-In invoque Saint-Herbert pour faire querre eul pleufe.
-A l’saint Wulfran, l’solel n’est jamais bin franc.
-A l’saint Wulfran, du printemps fleurit l’safran (le crocus).
-A l’saint Wulfran, taille tous les arpes qui sont souffrants.
-Chou semé à sainte Claudia se dégustera à sainte Lydia (03 août).
-Engrais à l’sainte Claudia, résultat immédiat.
-A l’sainte Alexandra, l’hiver est dins d’biaux draps.
-A l’sainte Alexandra, taille les cédrats.(Et pour respecter la thématique, le cédrat est utilisé pour faire du lait hydratant pour le corps !)
-A l’sainte Alexandra, rimpote l’aphélandra.
-Aujord’hui, bon anniversaire (40 ans !) à l’animatrice télé Faustine Bollaert, dont l’grind-oncle Felix Bollaert, ancien directeur de l’compagnie des mines de Lens, a donné sin nom au stade Bollaert où évoluent les Sang et Or ! Allez Lens ! Allez Lens ! ♫
Ce mercredi 20 march, exactemint à 21h58 et 25 secondes, ch'est l'équinoxe de printemps. Cha signifie tout simplemint qu’ l'hiver s'achève et qu’in quinge ed’ saison. Ch’est pos trop tôt !
In puss, l’ équinoxe de printemps intervient tout juste 3 heures avint l’momint où la leune est entièremint pleine dins l’ciel. Et les amateurs de pestaques célestes peuvent se réjouir, comme ale est aujord’hui au plus près de la Terre, i s'agit bin de c’que les astronomes appellent eune « Super Lune »
Attintion ! La « super-lune » n’a rin à vir aveuc le gros popotin de Kim Kardashian !
J'viens d'raviser l'leune. Ale est jusse in face de m'cuisine. Ale est toute ronde, fort brillante, mais ale a quind même rin d'vraimint "super"...!
Derniers commentaires