Un beau pré
Dins l'vallée d'la Course.

Tout comme s'arquinquent ches jonnes coqu'lets,
Lanch'rons, margrites et pipolets
Drèchent leu gaunes et blanques tchiotes figures
Sur l'herbe raverdie d'ches bassures.

Arcrans, p't'ête d'servir d'affiquets,
Dins l'ciel, ches étoiles in bouquets
S' sont cangées pour ête garnitures
Dins ches prés, pis ches pâtures.

Pus qu'in ravise, pus qu'cha sanne bieau !
A ch'solel, ch'est comme un morciau
D'Paradis déchindu sus l' terre.
Et par nos yux, ch'raviss'mint-là
Passe dins nos coeurs, si bien qu'déjà
Ch' bonheur-là n'leu sanne pus un mystère.

D'après Léon Goudailler (Sonnets Picards. Université d'Amiens)

Vocabulaire :
Un lanch'ron : un laiteron
Eun' margrite : une marguerite
Un pipolet : une renoncule
Des affiquets : des colifichets
Ches bassures : les terrains en contrebas
Arcrans : fatigués
Cha sanne bieau : cela semble beau

Relevé dans : Commint qu'i dijot pépère ? de Guy Dubois