José Ambre



Les pieds d' viau àl' mod' de m' mémère.

In dira qu'in est six, et t'accates six pieds d' viau.

Pou' qu'mincher, dins eun' marmite, te détoulles 6+0 gr ed' fareine aveuc tros lit's d'iau. Te balles ed'dins 1/4 ed' lit ed' bière blond', et là, accoute me bin n' baill' point à cornal's.

Dins t' marmite, te rajoutes 60 gr d'ogons, tout cha copés in rondelles, eun' branqu' ed'thym, eun' feull' ed' laurier, et eun' pugnie d' gros sé.

Te mets dins tin jus les six pieds d' vieau qu' t'as bin écrapés, et te laiches cuire duch'mint pindant 4 heur's.

Là, t'as tout tin temps pou' préparer t' sauce.

Te fais un roux aveuc 30 gr ed' burre et 40 gr ed' fareine. Te mouill's aveuc 1/2 lit' d'iau, te mets là d' dins 100 gr ed' tous tiots ogons , te sales et te poif's.

Te laiches cuire, et au bout d' 1/4 d'heur' te rajoutes un jus d' citron, un verre ed' bière, et te loyes cha aveuc un gaune d'ué d' glenne.

Te peux fair' à côté eun' pallée d' riz ou quèqu' poen'é'terr's à l'iau.

Des pieds d' viau ch'est bon, mais quand qu' te les présintes aveuc pad'zeur eun' sauce pouillette ainsi, sers te ch' preumier, sinon, t'aras pus qu'à ronguer ch' plat !

L' minger à l' bière - 40 recettes à la bière racontées en patois par José AMBRE