Chblog, le blog chti

J'éto haut comme tros peimmes
Qué j'rêvo d'ja d'un vélo d'homme
Un comme ch'ti qu'avo min père
Pou d'aller ouvrer sous l'tière

Ch'patron i monto su un biau g'vau
Min père li caracolo su sin viux vélo,
Pa tous chés timps, pleufe ou caleur
Du co i n'avo pu gramint d'couleur

L'uinache eud sin vélo servo d'sonnette
In l'intindant chacun tourno s'tiête.
Comme i n'avo pos eud leurmière d'sus
A l'brunne i s'arreto à chés coins d'rues.

Chele chaine sautot tous les quate dogts
Et l'reule de d'vant toudis s'voilot
Aveuc unne selle durte comme du chimint
I fallot léver sin cul tout long du quémin.

Unne bielle fos j'a voulu monter ed sus
J'a rammassé un biau gadin din l'rue
Machukant min jnou, troant m'maronne,
Heureusemint j'a écrassé personne.

Malgrè cha j'avo caire miler a l'ferniête
Acoutant, orelles grantes ouvertes
L'grinchemint qu'j', attindo tous les jours
Ch'ti du viux vélo finichant sin tour.

Jean Marie Klavzer

Jojo (en souvenir d'un ami très cher)

I étot m’n’ami, min comarate,
Claué su s’caïelle, tel Jésus su s’crox
Aveuc li, j’arfaiso l’monte pus biau
Li n’croïot pus, à tous ches salates

I comptot ches heures pou t'nir s'qu'au soir,
Tuant sin timps dins ches pintes ed mousse
I chuchot des brunes des blondes et des rousses
Busiant su s'vie, seu assoïé din l'noir;

I étot m'n'ami, min comarate
Dro sans un clau i trônot près d'sin fu
Milant ses angouches qui prenotte ech d'sus
L'impêchant d'arquer,l'rindant toudis mate.

J'arrivo ale brunne pou mette du carbon,
Ses yux is luisotte, s'bronne ale cangeot.
Quéqu'fos i cantot ù ben i uinniot
Mi ej l'acouto comme sin grind garchon.

Pis, ch'ti qu'j'appelo Jojo, un biau jour,
I n'a eu assez d'ete toudis crankeus,
Ed pu savoir arquer et d'ete tout seu
Pou longtimps, i est dalé faire un tour.

Jean Marie KLAVZER

busiant : réfléchissant
assoïé : assis
milant : épié
uinnier : grincer-pleurnicher
bronne : figure
angouches : douleurs vives
arquer : se bouger
crankeus : maladif

Un petit texte en patois écrit en souvenir de "min pépère" - Jean Marie KLAVZER

Ché pos grand cosse, mais ch’ti qu’min pépère i m'avot fait, i est incor dins m’tiête d’pus sossante ans. I l’avot fabriqué aveuc pos grand cosse, unne vielle planque, quate bouts d’queue et des viux clos ardrechés, es n’hache et pis unne scie dins un étui in bos, pou mesurer i avot ses pouches et ses dogts .
I l’avot appoïé conte ech pignon in plein solel, d'vant ch’gardin, pou miux vir pousser chés fleurs et attinte canter chés salates. Cha devot ête unne craque pasque mi ej n' a jamais rin intindu. A forche d’ête assis su ch’bamc aveuc pépère ou mémère, m’tiête ale a comminché à s’rimplir.

I n'disot pos qu’des carabistoules pépère, i disot aussi qu’chés batalles cha n'servot qu’à faire des tros, comme ch’ti qu’i avot à s’gampe et qu’ches médalles chétot du grain pou ches paons, et pis i disot aussi qu’in d’vot jamais rabaisser s’maronne d’vant l’injustice. Pus tard j’a compris s’qu’i voulot m'dire. Pou li l’ouvrache cha n’tuot pos, à l’condition d’faire ducasse eud timps in timps. Ch’gardin i m’l’a expliqué in long et in larche, laicher ches viers dins l’tierre, qu’i folot rassaker ches picholis , laicher ches moniaux tranquile, n' pos sémer dru. I savot in parler des heures intières.

Mémère ale m’parlot du tiot jésus, d’ech pain qui fallot pos jech’ter et surtout d’faire unne crox d’sus avant d’ coper . Ale disot aussi qu’ ech devo tout minger m’soupe, autremint ej restro minguerlot. Qu’in étot ben!

A forche d’ête assis d’sus, un biau jour i s’est brisié, pépère disot que chétot un nœud dins l’planque; ej pinse putôt qu’em tiête ale étot d’vénue trop lourte.

Jean Marie KLAVZER