Chblog, le blog chti

Grève des mineurs ; syndicat de la grève ; carte postale ancienne

Henri i étot in tiot peu bas du cul, in disot même qui mesurot pos gramint pus qu’unne pugnée d’pouches. S’man ale avot suremint du l’assir su un tonnieau quand i étot jonne. Tout l’année Henri i avot sin béret collé su s’tiête, unne maronne ed toile bleu ténue par un cheinturon jaune qui fejot, au moins, cate doigts d’larche.

Pindant ches grantes grèves ed carante uit, ch'est li qui portot ch’drapeau dins les défilés, ch’étot un méneux, un tiot peu mordreux su ches bords.

Ches gartes mobiles is voulotte rintrer su ch’carau d’el fosse onze . Henri aveuc ses conmarades i étot monté su ch’mur pou leu jech’ter des caillaux et des biscaïens , cha dégringolot comme à Gravelotte. Seulemint les autes is ont invoïé des gas, cha puot dins tout l’cité. Du cop chés grévisses is ont sauté in bas de ch’mur, Henri i a ripé du mauvais coté et i est resté incrinqué par sin cheinturon, à unne des lanternes qu’i avot à l’intrée. Ches gartes is ont voulu l’cueillir comme unne pronne, seulemint Henri i ruot parel qu’un kévau, i a un garte qui s’a fait rectifier s’guiffe d'un cop d’godasse à claus. Ch’t’affaire ale a conduit nou Henri in prijon pou unne paire de s’maines, i étot pos tout seu malheureusemint.

Os veillez mes gins, quand in a arvu Henri avec sin nouviau cheinturon jaune, ben, in étot fier qui restot dins nou rue.

JMK


"Merci tizautes"
Danny Boon

"Fier d'être chti-mineur."
La Voix de ch'nord

Qu'du vrai, in l'sint
Nord Minteux

"Comme si in n'y'étot"
Le point

"In r'portage su vif, longtimps après"
Paris Match

Hymne à la solidarité.
Le Galibot :

Même défit, même combat.
Solidarnosc

In n'est pris aux tripes, in pourra dire plus tard : gél' lai lu " cheinturon jaune d'JMK"
Mincoin

Cheule histoire armonte à ben longtimps. Comme in féjot pos réveillon min blanc-bonnet am dit » t’iros pos acater un cramique in Belgique cha do incore éte ouvert ? M’vla parti, tout in r’wetant ches vitrines racachantes. In Belgique ech quai su un comarate, os savez commint qu’cha va, in bo un d’mi pis « armettez nous ches verres comm’is z’étotte » ; ch’est comme cha qu’i étot pos long d’minuit quind j’a arpassé ech pont qui servot ed frontière.

Lire la suite...

Quéqu’fos l’neiche al fait braire ches infants

Ed'pis unne semaine el'frodure ale étot là, ches cornalles is avotte el trannette. Man, aveuc unne pallée d'gaillètes ed timps in timps, ale n'arrivot même pus à récauffer chele maison. Ech mercredi là, cha n's'inrringeot pos, même que ches daches ed mes galoches is fesotte des claquettes su l'tierre ingélée. L'pus pire, ch'étot ches dogts et ches génoux surtout, pace que in carante neuf, ches lonques maronnes pou ches garchons, is s'arrêtotte au d'zeur ed ches génoux.
Tout l'jour j' zieuto l'ferniette pou vir si l'timps i tournot pos à l'neiche ; ch' maîte i m'a invoyé printe l'air, i croïot qu'ej dormo. In sortant ed l'école cha comminchot à querre tout douch'mint, ches flocons is étote pos à l'presse ed blankir el tière. L'timps ed rintrer à m' mason, in trinnant bin sur, is avotte fait des jonnes.
Man trouvot drôle qu'em tartine ed castonate restot su l'tape, "té lambines, j'va printe ete timpérature, moutre chi tin front !». Mi j'éto d'jà in route à faire un bonhomme ed neiche dins m'tiête. Au soir, pa qui d'vot printe sin poste ed nuit, s'demindot commint qu'i allot faire pace que ché pus unne paire de flocons, mais deus pugnies d’pouches ed neiche qu'i avot dins l'rue. Pou finir i est parti à pieds. D'pus in pus crignu, ej su alé m'couquer in oubliant m'brique caute pou récauffer mes draps. Quand ej su queut indormi cha été pou rêver d'un bonhomme si grand qu'un arbe à chériches, sin nez i étot parel qu'un pain d'tros lifes et sin capiaux ch'étot unne boulleusse numéro sis. Seulemint min rêfe ch'est d'venu un cauchemar, ech bonhomme i a ballé su mi, j'éto acoufté comme unne chique. Au momint ù qu'ej commincho à m'étoquer heureusemint ej me su réveillé.
Comme cha claquot su ches carreaux j'a arvétié à l'fernête, i pleuvot à drache, l’neiche ale avot sin cul lavé, pu rin !! Ej su artourné dins min lit et ja brè à fréquir ches draps.
Pou m'armonter l'moral, man ale disot brèe tiot, ch'est autant d’moins à picher.

JMK

S’étoquer = s’étrangler
acoufté = recouvert


Heureusemint al' les fait pas toudis braire !