avr.19
dans la catégorie Poèmes chti
In viux billets, mais un poème qu'j'ai querre :
L' solel, cras comme eun' motte de' burre, pour lire la suite buque su ch'lien : Cha sint l'printemps
avr.15
dans la catégorie Poèmes chti
L'câble est tindu. L'cage elle arpose
Au d'sus du tro d'mill' pieds parfond.
Les mineurs vont desquindre à l'fosse,
L'corage au coeur, l'audace au front.
Jules Mousseron, Poête-Mineur.
Ch'est vrai qui fallot po avoir frod aux zius pour déchinde dins ch'tro !
juil.04
dans la catégorie Poèmes chti
Le chevalet de la fosse 6 d'Haines
Complainte pour une fosse oubliée.
J’n’ira point fêter l’Unesco,
J’peux point crier cocorico !
Rien qu’à vir t’n’air misérape,
J’iros…je m’sintiros coupape.
D’pis mil neuf chint vingt qu’t’es debout
T’in a bien vu des hommes d’about,
Des mineurs et des galibots,
Et des trieuses…eh bin , té vos…
mar.08
dans la catégorie Poèmes chti
Les yux d'ches femmes
Dins les yux d' chaque femme
y a de la joie et des drames
du plaisi et de l' souffrance
et parfos un reste d'infance
mais dans les yux d'ches femmes
i devrot jamais y avoir d'larmes
ch'est fragile comme eune fleur
et pourtant si solite au labeur
dins les yux d'chaque femme
mi j'arvos ceux de m'mère
aussi pour mi ch'est un drame
que d'vire eune femme braire
dins les yux d'chaque femme
y a tant d'amour et d'caleur
y a aussi comme eune flamme
qui fait du bin à min coeur
Bierlair René dit Cartouche
mar.05
dans la catégorie Poèmes chti
Galibot meneux d'quevaux, en photo, relevé dans Les chevaux de mine retrouvés de Sylvain Post
Le galibot, mot ch'ti qui désigne un enfant ouvrier mineur, conté par Isaïe Lampin, poète patoisant de Souchez, ancien mineur.
La version conté par Isaïe Lampin : Le galibot, Asaie Lampin
Le Texte : El (Le) galibot
I l'est pas core chinq heures, déhors i fait core nuit
Eune à eune toutes ché lampes y s'alleument autour de ch' puits
L'heure qu'alle a tant ardoutée, alle le vot arriver
Es n'infant i dort cor, alle s'in va l' réveiller.
Avant d'ouvrir l' porte alle intind eune tiote voix
Ech gamin i a compris es maman alle est là
L'matinée là, surmint i s'in rappelera tout l' temps
I est haut comme tros peimmes, i n'a pas cor quinze ans.
Sin p'tit nez s'est pinché, ses yux i sont rougis
Nan ch' tiot i-a pas brait, mais il a mal dormi
I l'a vu tout passer, tout a tourné din s' tête
Cha a tourné sur'mint pu vite que les molettes.
Es maman alle est là tout alintour ed li
Pour l' première fos de s'vie, i va quitter sin nid
I sait à peine voler, il li faudrot quéqu'in
Sin papa n'est plus là pour li l' printe par la main.
Alle l'imbrasse core eune fos, alle le serre sus sin coeur
Min tiot i faut partir, té vos i va ête l' heure
Ché mineurs i s'in vont, i vont t'accompagner
Avec eusses n'ai pas peur, i n'y ont tertous passé.
Mais ch' quémin qui dot faire i li parait si long
I l'a tant ravaudé pour li juer au ballon
Qui qu'minche à découvrir des coins qui n'a pas vus
Ech chevalet là-bas, il est au fond de l' rue.
Es ' tiote barrettes sus' tête, es musette à sin dos
Avant d'rinter din l' cache, i soupire un grand cop
Ses pétites mains sont moites, sin pétit coeur i bat
Dins in pétit momint i sera tout in bas.
Alors comme un éclair toute s' jeunesse alle arpasse
I s'arvot sus ché bancs quand il étot in classe
I r'pinse à sin papa, sin pépé, sin papi
Pour faire ech dur labeur, i n'y ont laiché leu vie.
Avec deux gros yux ronds comme un p'tit cat poursui
I tersaute à chaque cop qu' cha buque autour d' li
I baisse bin s' pétite tête, i va butter ses pieds
I li faudra longtemps pour apprinte ch' métier.
Et cha va ête comme cha pindant l' pu dure journée
Quand briquet i viendra, cha n' voudra pas passer
Sin bout' lot, ses tartines i resteront din s' musette.
Pour sin tiot frère in haut, cha s'ra ch' pain d'alouette.
A mitan arlavé aved deux grosse leunettes
I traverse ch' coron comme eune poute d'escampette
jamais autant dé s' vie, i'a aimé es maman
Alle est là qu'alle attind, d' pus ch' matin in tremblant.
I queur eune dernière fos, il li saute à sin cou
Alors deux grosses é larmes queurtent sus leurs joues
Et pi tout in frémichant, s' blotichant sus sin coeur
I li dit calmemint, maman, j'ai pas eu peur.
Isaïe LAMPIN ( 1927 - 2007 )
oct.18
dans la catégorie Poèmes chti
CH’ SOULAUD ET S’ FIN.ME
Tertous in a des vices, et toudis in s’y tient :
De n’ n’avoir honte cha n’ cainge mie rin.
In parlaint d’ cha, v’là chi eun’ cafougnette
Pour vous moutrer, des fos qu’ vous sérott’s biêtes,
Chu qu’ j’ raconte.
Un dépindu d’ soulaud
Asniquot ses boïaux et s’ tiète, vuidot ses poques.
I n’a des gins comme cha qui train’tent dins leus loques
Margré qui sont pas viux, langreux comme des bièque-bos.
Eun’ fos qu’ ch’ tiot Gustaf’ (ch’est l’ nom à no toutoule)
I-étot pu dins ses queuches, ayaint trop bu d’ bistoule,
S’ fin.me Tina l’infreuma dins l’ cabane-à-z-outils.
Gustaf’, pa l’ guénièf’ tout guerzi,
I cuvot ses toxines. À sin rével i treufe
Autour dé s’ guife ed’ bos ch’ l’attiral à croque-morts.
« Ah ! ben, j’ai dû grin.mint faire fort,
Busie notre homme. À ch’t’ heure, em’ fin.me all’ s’rot-ti veuf’ ? »
Là d’sus, manman Tina, in costume Belphégor
Noirt’ jusqu’à l’ bout d’ ses pids et d’eun’ vox de stentor
Arrif’ à ch’ faux cadaf’ in s’approchaint dé l’ bière,
Li donne du Canigou dins eun’ cuvielle in fier.
« Ch’ cop-chi, qu’i s’dit Gustaf’, n’a pas d’ manières à faire ;
Tout drot t’es rindu in infer. »
« Queu qu’ cha n’ n’est que ch’ bazar ? In dirot un fantôme !
- Qui j’ sus ? J’ m’in vas té l’ dire, bolhomme :
L’ bonniche à Luchifer ; ch’est mi qué j’ donne à mier
À ch’ti qué ch’ Bon Diu fout à l’huche.
- À mier ? qui dit Gustaf’, cha ch’est
Bin biau ; as-tu pinsé à l’ chuche ? »
Jean de la Fontaine
Mise en picard : Jean-Pierre Darras
Jean-Pierre Darras et sa femme Marie-Paule sont des comédiens patoisants (entre autres) de Cambrai, et sont les amis de Kimberlote. Connaissez-vous leur site ? http://www.claraetbistoule.fr/picard/
«billets précédents - page 1 de 9
Derniers commentaires