Le Blog chti

Un fin rayon d’ solel au volet mal serré
Vient récauffer ses mains , s’ poitrine alle s’ soulièfe ,
Tout duchemint sans un bruit, ses yux se sont fermés
Et pis un long soupir vient caresser ses lèfes.
Alors , eune dernière fos , un prénom murmuré,
Vient apaiser s’ figure et ralleumer s’ mémoire.
Alle s’ arvot à vingt ans , agitant un bouquet
Crucifiée à jamais , sur un mécant quai d’gare.
Près d’sin lit , un portrait , dins un cadre doré
Et soigneusemint pliée ,l’ lette au papier jauni ,
Qui li dit , li promet : « attinds-me, j’arviendrai »
Qui li dit , li promet : « cha s’ ra bétot fini ! ».
Duchemint , eune dernière fos , s’ poitrine alle s’ soulièfe,
Mais alle arkaira pas , sin calvaire est fini.
Chu qu’alle a espéré tout au long de ses rêfes,
Va enfin arriver , elle part vers l’infini.
Un bleuet est posé intre ses deux mains jointes ,
Au long , des cris d’ éfants et eune cloche qui sonne ,
Alle ne les intind pus, alle est partie arjointe
S’ n’ éternel fiancé dins les plaines de l’ Argonne.
Agenouillée par terre , avec mille précautions,
Alle y arlièfe s’ tiête , prind un boutelot d’ fer blanc,
Alle fraiquit un mouchoir , brodé à sin prénom,
Et li essuie ses lèvres, tout in y souriant.
Pis quand sur sin visache , alle a essuyé l’ glaisse
Alle rapproche s’ figure , l’ ravisse et li sourit ,
Pose enfin sur s’ bouque l’ pus douche de toutes les baisses,
Et murmure à s’ n’ orelle : « cha i est, ch’est fini »

Bertrand COCQ

Le canal de Mons à Condé sur Escaut dans le 59

Lauvau du costé d'Sé Ghislégne
L'long du canal, on voit souvint
Des hommes des femmes, des gamégnes
Trainant é batiau tout belmint
Maugré l'pléve, el vint, ou l'orage
Leux gampes roidies comme des piquets
Il in vont, toudi plées d'courage,
Saquiant dtout leu force el baquét.

Lire la suite

Inn' bonn' leçon

El' grand dudul étot malade.
Faut vous dir' que ch'est in guinceux
I avot s' nez rouch' comm' in' tomate
A forch' ed' léquer ch' grand buveux.

Lire la suite

Ch'piche
Eu'je gliche
J'm'artiens
Eu'je qué
Dins l'brun !

Min pétit parisien

Même in f’sant attintion, j’ t’aros pon arconnu,
Té pinses, d’ pus l’ temps comme mi, t’as du rud’mint cangé,
Mes caveux ont blanqui, j’ai quarante-chinq ans d’plus,
Pis in s’a vu qu’ un coup, pis cha été vite fait.
Malgré min viux mantieau, taillé dins ch’ti d’min père
Un grand châle tricoté, pour pas ‘ttraper la crèfe,
Des candelles à min nez, j’étos pourtant bien fier,
D’ faire la quête à Paris , pour ches mineurs in grèfe .
Té ténos l’ main d’ tin père, bien sage sur ch’ trottoir,
L’ mien n’ étot pas là , i gardot ch’ carreau d’ fosse .
Quand j’ai tindu min tronc, j’ai croisé tin regard,
Comme mi j’ai bien vu qu’ té n’ comprénos pas grand cosse.
L’pétite pièche dins cheulle finte, alle arot du glicher
Mais te l’as mis dins m’ main, et mi j’ l’ai mis dins m’ poche.
Té sais pindant longtemps, j’ai cru l’avoir volée.
Té sais pindant longtemps, je m’ in sus fait l’ reproche.
D’ pus ch’ temps là, des p’tites pièches, min pétit parisien,
Je n’ai donné souvint, sans jamais m’ occuper,
D’ l’ état, ou de l’ couleur de ch’ti qui tindot s’main ,
In ravisant ches gins , comme té m’as ravisé.
Même in f’sant attintion, j’t’ aros pon arconnu,
Pétête que t’es à s’ t’ heure, in inragé d’ foteball,
Mais mi j’in sus certain, quoique té seuches devenu,
Ti, t’as pas pu écrire l’ fameusse banderole.

Bertrand COCQ

Fin merci à toi talentueux Bertrand, et bienvenu chez les poètes chti.