Le Blog chti

Version sonore : Régis




Eul’ guernoule qui voulot éte aussi grosse qu’eul bœuf

Un jour ein’ biell’ guernoule qu’y’ étot sortie d’l’étang
Pou s’cauffer au solel aperçot un géant.
Ch’étot un bœuf qui v’not à l’mare pour boir’ un d’mi.
A vir ein’ si gross’ biêt’ eul’ guernoul’ fut saisie.
Elle se dit in ell’ même « j’ai invie d’essayer
Eud fair’ grossir min vint’ afin d’li arsembler »
Et l’v’la qui comminche à faire infler sin corps
In d’mindant à s’petite sœur « j’y sus point incor ? »
Eh bé non. – Et à ch’t’heure ? – Te n’ n’est lon. – Bon, et là ?
- T’as bieau fair’ euj sus sûr que t’y arriv’ras pas.
- Eh bin ch’est ch’qu’on va vir ». Mais à forc’ eud gonfler
Ses boyaux dins sin vint’ ont fini par péter.
Ch’est triste mais au fond, in busillant bin
Dins la vie ch’est parel. Et y a toudis des gins
Qui n’ont jamais assez, et te vos des machons
Qui voudrottent rouler dins l’autio d’leur patron.


fablenchti
Auteur: Jo Tanghe
Editions GabriAndre
IBSN : 2-909788-88-1

Lire la suite

Version sonore : Régis




Tiote, viens donc vir...
( d'après Ronsard)

Hé, tiote, viens donc vir dins ch' gardin
Si chelle rose, équ' timpe* à ch' matin,
S'étot dessaquie* d'sin saclet*
Et qui s'ardrèchot* si fièremint
Avec un si fraîche sintimint,
All' n'est point, à ch' t'heure-chi, pamée*!

In peu d' temps, ravise* ichi
Commint qu'all' est dev'nue toute réquerpie*.
All' étot si bellote à ch' matin,
Et pis l'voilà toute desséquie* !
Crénom des os, que tchienne ed' vie !
In n'a vraimint pus l' temps d'arien*.

Té sais, tiote, oeuv' bin tes orelles !
T'es là qu' t'es belle comme un solel !
T'es à croquer, té pètes el' fu !
Alors, profite pindant qu' t'es jonne !
Parc'quand qu'té s'ras comme eun' vielle pronne*
Personne d'sus ti n' s'artourn'ra pus !

Mis en chti par José Ambre

Lire la suite