Facheuse rinscontre

I f'sot brun soir. El nuit étot complète.
Dins les corons in n' véyot point eun' pette.
Point eun' leumièr'. Les gins étott'nt au lit.
In n' véyot pas clair à quat' pas d'vant li.

Un carbonnier r'gagnot viv'mint s' démeure,
Claquant s' chabot sans s'imbararrasser d' l'heure,
S' pipe à ses dints, el bourgeron flottant,
Allongeant l' pas, i allot friant-battant.

Dins un peignon, ah ! bon sins ! queu culbute !
Sur un piquet, v'là-t-i pas qu'il arbute !
Berdouff ! un cop à être estomaqué,
Rinviant l' coron tell'mint qu'il a buqué.

L' main su s' boursiau, i crie et s' déclaminte
Après l' piquet qui li-a épautré l' vinte :
"Cré fainéant ! qué té m'as fait du mau !
Si t' s'ros un homme, ej té poche el gasiau !"

Jules MOUSSERON
Eclats de Gaillettes (1913)

Pette : miette
Chabot : sabot
Bourgeron : vétement de travail en toile
Peignon : pignon d'une maison
Arbuter : se cogner
Rinvier : éveiller
Buquer : heurter en faisant beaucoup de bruit
Boursiau : bosse sur la tête
Déclaminter : se lamenter
Epautré : serré
Vinte : ventre
Pocher el gasiau : étranger (le gosier)