Non… n’ dis rien… j’ sus chi à l’ ducasse,
Jé n’ veux pas qué rien n’ té tracasse,
Quand té viens, bonheur sans parel,
Dins l’ mason, t’apport’s du solel…
Seul’mint, té n’es pas v’nu pou geinte ;
Té n’as aucun’ raison det’ plainte…
Et si les gins n’ tourn’tent pus rond
Dis-té bin qu’ ch’est pas tes oignons !
J’ sais bin qu’ tas ouvré t’n’existence
Avec beaucoup d’ forche et d’ vaillance,
Et qu’ comme artrait’, ch’est malheureux, (retraite)
Té touch’s ein’ dringelle ed pecqueux… (petit pourboire)
Té n’es pas puni pou tes fautes,
Té subis les bêtiss’s des autes,
Mais tout d’ même i n’ té manqué rien,
Tes infants sont là, nom d’un kien !
T’as ouvré comme un mercenaire
Pou qu’in puch’ sortir ed l’ornière,
Et ch’est à t’ courache ed lion
Qu’ nous dévons no situation…
Eh ! bin, papa, lé v’la, t’n artraite,
Ch’est par tes infants qu’ té l’as faite…
Ch’étot nous tin vrai capital…
Comm’ plach’mint cha n’ tot pas si mal ! (placement)
J’ sais bin qu’ té t’aros fait ein’ fête
(Maman arot mis s’ colinette)
D’archévoir tertous in mêm’ temps
Tes infants et tes p’tits infants...
Et pis, tout in juant à cartes,
In arot bu l’ café moka,
Ramonch’ lés comme’ des jonn’s ed cats ! (rassemblés)
Té n’as hélas ! pas d’ sous pou l’ faire,
Mais vraimint n’y-a pas là d’ quoé braire, (pleurer)
Ch’est tout du même, apa, veyons, (employé quand on s'adresse à son papa)
Puss qué vous n’ nez à nos maisons !
Pinse aux vieux qui n’ont pas d’ jeunesse
Pour v’nir récauffer leu vieillesse,
Aux vieux qui s’artouv’tent tout seus,
Sans pain, sans peun’-tierre et sans feu ! (pomme de terre)
Mais, toi, quand té vos tes p’tit’s filles,
Si bell’s, si fraîch’s et si gentilles,
Qui vienn’ tent danser su tes g’noux,
Dins l’ fond dé t’ vieux cœur ch’est si doux…
J’ sais bin qu’ maman parfois t’imbête
- Cha fait cinquante ans qu’all’ rouspète ! –
Mais malgré cha – chu qu’ ch’est qu’ l’amour ! –
Vous s’aimez mieux qu’au premier jour !
Alors à quoé bon t’ fair’ dé l’ bile ?
Profit’ bin dé t’ vieilless’ tranquillle
Et viens nous vir tant qu’ té voudras.
In est dix à t’ouvrir nos bras !
Alors, cha va ? tin romatique (rhumatisme)
Té l’ frott’s incor à l’huile antique ?
I t’impêche incor ed dormir ?
Quand i fait frod, i t’ fait souffrir ?
N’ tin plains pas, tu, cha s’rot folie :
Tes douleurs, ch’t’ un brévet d’ longu’ vie.
Mi, j’ té souhait’, sans grand effort,
Ed les sintir trente ans incor !
Allez, apa, pas tant d’histoire ;
Vid’ tin verr’ qué j’arverse à boire,
Et in attindant les infants,
Racont’ min t’ service ed tros ans ! (service militaire)

Emile Morival
Premier prix aux Rosati de Flandre 1946
Extrait de Noir Pays, Marché Noir (1946)

Emile MORIVAL écrivain Picard est de Valenciennes (1913-1976)
Ses ouvrages :
Poussiers captifs, poésies patoises (1945)
Noir pays, marché noir (1946)