Adolisant les p’tiots, qu’ils soign’nt avec ferveur,
Les pépèrs’s rit’nt parfos, s’couant leu pauv’ carcasse,
Sous l’ solel du printemps, i’s sont cor d’ bielle humeur,
Et jut’nt pou l’s amuser, sans pinser qué l’ temps passe.

In r’busiant au jeun’ temps, i’s oblit’nt leus vieux jours.
Et soudain, in r’veyant l’ si longu’ rout’ parcourue,
I’s argrett’nt qué l’ destin à leus vœux resta sourd,
Et, un tiot fieu pas l’ main, i’s arvienn’nt par el rue …

Assis au coin du feu, parlant du temps passé,
I’s racont’nt des histoir’s, pindant des heur’s intières,
Aux marmots qui l’s acout’nt et qui, jamais lassés,
R’weit’nt avec des grands yeux étonnés les pépères.

Pis, dins leu bouq’ ridé, leu pauv’ viell’ bouqu’ sans dints,
Leus deux coud’s su leus g’noux, i’s tienn’tent leur boraine
Et feum’nt in arweitiant gra’mèr’ qui, d’ pus longtimps,
S’est assoupi’ d’vant l’ feu, l’ main su s’ front, comme eun’ reine.

Et les pépèr’s, les vieux, qui tot’nt jadis les forts,
El figur’ racarpi, courb’nt davintach’ l’échine.
Eun’ larm’ r’flèt, dins leurs yeux, l’ lueur des espoirs morts,
Les souv’nirs ed bonheur, et d’ misère et d’ débine.

Georges Fidit (1864-1926)
Valenciennoiseries (1901)

Racarpi : ?
Adoliser : cajôler
Re-weitter, veittier : regarder
Débine : ?
Boraine : pipe en terre