Aai, vous m’disott’s : « Viens, m’ tiot’ loute ! »
Pour mi, ch’ tot un régal, vo pain et vo chirloute.
Vous m’ faisott’s minger vos pain et vo chirloute.
Vous m’ faisott’s minger vos viell’s croûtes.
Si vo burre i sintot trop l’ fort,
Ch’atot pour mi tout d’ suite et cha n’ mé f’sot point d’ tort.
Vous s’ rapp’lez combin qu’ j’étos sache
Pou boire ed vo café du trosième arpassache ?
Souvint vous oubliott’s d’y mette el principal,
Mais cha passot tout d’ mêm’, j’étos pas difficile ;
Avec du vieux pain sec et du formag’ qui guile
Vous m’ confectionnot’s un régal …
Souvint j’y pins’ grand mèr’, j’ voudros ravoir vos baisses,
Vo café, vo pain dur et l’ biau temps dé m’ jeunesse …

Valenciennes, 27 juillet 1902.

Gabriel Lermusiaux (né en 1885)