Car cheul' pindul' m'r'app'lot l'souv'nance
D'mes grands parints et d'leu doucheur,
D'leu gross' baiss's, j'sins incor l'caleur
Chaqu' Dimanch', ch'étot l'mêm' séance.

J'avos des chucattes à m'gra-mère
Pourtant, m'n'admiration ch'étot
Cheul' viell' pindul' à l'allur' fière
J'étos bénach' quand ell' sonnot

Et pou m'fair plaiji min grand-père
Faijot avincher sus l'cadran
L's'aiguilles, pis, tinter l'sonn'rie claire
On s'amusot comm deux infants.

A lir l's'heur's et les minutes
Avec patience, i m'apeurnot
M'gra-mèr', ell', li cachot dispute
Li dijant que cha m'fatiguot.

J'ai hérité d'cheul viell' pindule
Quand i s'sont indormis, tous deux
Bien qu'démodée et ridicule
Ell' m'ramintuf' des jours douch'reux.

J'l'ai installée sus m'queminée
J'ai raccroché sin balancier
Toudis s'sonn'rie sait m'apaijer
Dins les p'tits innuis de l'journée.

Mais pass'l's'années, roul' comm' eun pierre,
A min tour, pou mes p'tits infants
J'fais corrir l's'aiguill' sus l'cadran
Et sonner l'pindule ed' min grand-père.

Merci à Marie France de Marseille de partager ce joli texte avec nous.